Бельгия қироли Филипп Конго президенти Феликс Чисекедига мамлакат мустақилликка эришганига 60 йил тўлиши муносабати билан табрик мактубини йўллади. Монарх ўз мактубида Бельгия мустамлакачилиги вақтида Конгода амалга оширилган зўравонлик ва шафқатсизликларни қоралаган. Мактуб қироллик оиласининг сайтида эълон қилинди.
«Бугунги кунда ҳам азоб-уқубатлари давом этаётган ўтмишдаги яралар учун чуқур қайғуда эканлигимни билдирмоқчиман, чунки жамиятимизда ҳамон таҳқирлашлар давом этмоқда», — деб ёзади монарх.
Шунингдек, у Леопольд II даврида Бельгия мустамлакасига айланган Конго халқи узоқ йиллар давомида бошидан ўтказган камситиш ва азоблар учун кечирим сўраган.
«Келажакдаги алоқаларимизни мустаҳкамлаш ва самарали ҳамкорлигимизни ривожлантириш учун бир-биримизга умумий ўтмишимиз ҳақида самимий ва тўғридан-тўғри гапира олишимиз керак», — дейилади қирол мактубида.
Қирол Филипп Леопольд II нинг тўғридан-тўғри авлоди ҳисобланади. La Libre Belgique’нинг ёзишича, у ушбу масалада афсусда эканлигини билдирган биринчи монархга айланган.
Замонавий бельгияликлар қирол Леопольд II ни Конго аҳолисига нисбатан шафқатсиз муносабатда бўлганликда айблайди. Бу маҳаллий аҳоли геноциди ва ўлимига олиб келган. Турли ҳисоб-китобларга кўра, Леопольд II даврида мамлакатда бир миллиондан 15 миллионга яқин конголик ҳалок бўлган.
Мавзуга доир: Бельгия шаҳзодаси Испанияда коронавирус юқтириб олди
Изоҳ (0)