Канада танга саройи мамлакат аҳолисига оғир дамларда керакли нарсалар билан таъминлаётган волонтёрлар, озиқ-овқат дўконлари сотувчилари, шифокорлар, тиббиёт ходимлари ва бошқа ходимлар шарафига махсус танга зарб қилди. Бу ҳақда Канада танга саройининг расмий сайтида ахборот берилган.
Танганинг бир томонида Канада байроғидаги рамз барг ва юрак тасвирланган. Бошқа томонида эса улкан юрак атрофида айлана бўлиб қучоқлашиб турган одамлар тасвирини кўриш мумкин. Уларнинг остига инглиз ва француз тилларида «Ташаккур» сўзи ёзиб қўйилган. Бундан ташқари танга таркибида магнит мавжуд ва уни турли жойларга ёпиштириб қўйиш мумкин.
Танганинг нархи 9 Канада доллари 95 цент туради (тахминан 7,5 АҚШ доллари). Уни фақат онлайн буюртма орқали харид қилиш мумкин. Сотувдан тушган пулларнинг барчаси коронавирусга қарши хайрия жамғармаси ҳисобига ўтказилади.
«Канада танга саройи ушбу лойиҳа орқали пандемия даврида одамларга ёрдам бераётган барчага миннатдорлик билдиришни ният қилганди», – дейилади сарой раҳбари Мари Леменинг баёнотида.
Канадада коронавирус юқтириб олиш бўйича энг биринчи ҳолат 15 январда қайд этилган, 2020 йил 1 июль ҳолатига кўра мамлакатда инфекция аниқланган беморлар сони 104 минг нафардан ошиб кетган, 8,6 минг киши касаллик асоратлари оқибатида вафот этган, 67,5 минг нафар бемор COVID-19’дан тузалган.
29 июнь куни Канада бош вазири Жастин Трюдо мамлакатнинг коронавирусга қарши курашда муваффақиятларга эришаётганини қайд этган, бироқ хавф ҳали ортда қолмагани ва пандемиянинг иккинчи тўлқинига тайёр туриш лозимлигини таъкидлаганди. Унинг сўзларига кўра, статистика касалланганлар ва вафот этганлар сонининг камайиб бораётганини кўрсатмоқда, давлатнинг айрим ҳудудларида коронавирус инфекциясига чалиниш ҳолатлари умуман кузатилмаганини айтиб ўтган.
Аввалроқ Канада четдан келганлар учун изоляция тартибини 31 августгача узайтиргани ва унга амал қилмаганлар 6 ойга қамалиши мумкинлиги хабар қилинган.
Изоҳ (0)