Хитойлик олимларнинг янги чўчқа гриппи — G4 пандемияни келтириб чиқариши мумкинлиги ҳақидаги маълумотлари етарли асосларга эга эмас. «Интерфакс»нинг хабар беришича, бу ҳақда Хитой ТИВ вакили Чжао Лицзянь 1 июль куни маълум қилди.

«Экспертлар ушбу ҳисоботдаги материаллар ҳажми унчалик катта ва репрезентатив эмас, деган хулосага келди», — деб айтган у.

Шунингдек, у тегишли идоралар ва Хитой мутахассислари ушбу касалликни кузатишда, огоҳлантиришларни эълон қилишда ва унга қарши ўз вақтида курашишда давом этишини таъкидлаган.

Аввалроқ Американинг Proceedings of the National Academy of Sciences журналида Хитой Касалликларни назорат қилиш ва олдини олиш маркази олимларининг G4 чўчқа гриппи штамми ҳақидаги тадқиқот ишлари натижалари эълон қилинганди. Тадқиқотчилар «G4 вируси янги грипп пандемиясини юзага келтириши мумкин бўлган барча патоген белгиларга эга. Ўз кўриниши билан у мавсумий грипп штаммларидан фарқ қилади ва одамдан одамга ўтиши мумкин. Унда 2009 йилда чўчқа гриппи пандемиясини юзага келтирган H1N1 вирусининг барча белгилари мавжуд», деб айтганди.

Чўчқа фермаси ишчиларида тегишли антитаналарнинг мавжудлиги текширилганда, уларнинг 10 фоиздан кўпроғи G4 билан касалланганлиги аниқланган.

Вирус ҳайвондан одамга юқиши мумкинлиги ва унинг одамдан одамга юқиши ҳақида ҳеч қандай далил йўқ бўлса ҳам, олимлар вирус охир-оқибат одамга мослашиши ва одамлар орасида тарқалиши мумкинлигидан хавотирда.