Тошкент шаҳар Чилонзор тумани ҳокимлиги бўлим бошлиғи тадбиркорга ерга эгалик ҳуқуқини расмийлаштириб бериш учун 50 минг доллар пора олаётганида ушлангани ҳақида хабар берилганди. «Xabar.uz»нинг Бош прокуратурага асосланиб ёзишича, мазкур иш бўйича Тошкент шаҳар ҳокимлиги ходими ҳам қўлга олинган.
Бош прокуратура томонидан маълум қилинишича, 2020 йилнинг 22 июнь куни ҳуқуқни муҳофаза қилувчи органга Чилонзор туманидаги бир гектар футбол майдонининг сотихини 14 минг доллардан баҳоланиб, жами 1,4 миллион долларга сотиш режалаштирилаётгани ҳақида тезкор маълумот келиб тушган. Маълумотга кўра, мазкур «савдо» бошида Тошкент шаҳар ҳокимлиги Капитал қурилиш бошқармаси бошлиғи ўринбосари, 1968 йилда туғилган Б.А. ва Чилонзор туман ҳокимлиги Инвестиция ва туризмни ривожлантириш бўлими бошлиғи, 1985 йилда туғилган Х.Ш. тургани айтилган.
Дастлабки суриштирувда мазкур икки масъул шахс шу жойга қизиққан тадбиркордан дастлаб 50 минг долларни «закалат» тариқасида, қолганини бир ҳафта ичида, яъни ҳужжатлар тайёр бўлганидан сўнг беришни талаб қилаётгани аниқланган.
Ҳолат бўйича 24 июнь куни ДХХнинг Тошкент шаҳар бошқармаси ва пойтахт прокуратураси ходимлари ҳамкорлигида ўтказилган тадбирда Б.А. 50 минг долларни олган вақтда далилий ашёлар билан ушланган.
Қўлга олинган масъул пулларни Чилонзор туман ҳокимлиги бўлим бошлиғи Х.Ш.га олиб бориб бериши лозимлигини айтганидан сўнг тезкор тадбир давом эттирилган. 25 июнь куни Х.Ш. Б.А.дан 50 минг долларни пора тариқасида олган вақтда у ҳам қўлга олинган.
Қайд этилишича, айни пайтда ҳолат бўйича Жиноят кодексининг 20-моддаси (Пора олиш) ва 212-моддаси (Пора олиш-беришда воситачилик қилиш) билан жиноят иши қўзғатилган. Гумондорларга нисбатан қамоққа олиш эҳтиёт чораси қўлланилган.
Изоҳ (0)