ДХХ Бухоро вилояти бошқармаси ва вилоят божхона бошқармасининг контрабанда бўлими ходимлари томонидан ўтказилган тезкор тадбирда симоб моддасининг ноқонуний савдоси билан шуғулланаётган шахслар қўлга олинди. Бу ҳақда Давлат хавфсизлик хизмати «Дарё»га хабар берди.
Кучли таъсир қилувчи ёки заҳарли моддаларнинг ноқонуний савдосига қарши курашиш доирасида ўтказилган тезкор тадбирда Бухоро шаҳрида яшовчи О.С. 540 гр симоб моддасини харидорга 50 минг АҚШ долларига сотаётган вақтда ашёвий далиллар билан ушланди.
Бундан ташқари, Бухорода яна шундай бир ҳолат аниқланди.
Хусусан, Жондор туманида яшовчи Ф.Х. 3 кг 60 гр симоб моддасининг ҳар бир килограммини 4 минг АҚШ долларига сотиб, мўмай даромад топишни режа қилади. Бу борада унга Ромитан туманида истиқомат қилувчи Ж.Р. воситачилик қилади.
ДХХ ва Божхона қўмитаси ходимлари томонидан ўтказилган тезкор тадбирда улар юқорида қайд этилган симоб моддасини Бухоро—Газли автомобиль йўлида жойлашган автотураргоҳда сотаётган вақтларида ашёвий далиллар билан қўлга олинди.
Аввалроқ 2020 йилнинг май ойида Навоий вилоятида 25 минг долларга сохта симоб сотаётган шахслар қўлга олингани ҳақида хабар берилганди.
Бундан ташқари 2019 йил декабрь ойида Наманган вилоятида 700 гр симобни 6000 долларга сотаётган шахс қўлга тушган.
Изоҳ (0)