29 июнь куни Олий Мажлис Сенати Суд-ҳуқуқ масалалари ва коррупцияга қарши курашиш қўмитасининг мажлиси бўлиб ўтди. Йиғилишда бош прокурор ўринбосарининг соғлиқни сақлаш, таълим ва қурилиш соҳаларида коррупцияга қарши курашиш борасидаги фаолияти юзасидан ахбороти эшитилди, деб хабар беради Сенат ахборот хизмати.

Маълумотларга кўра, Бош прокуратура томонидан тегишли мутахассислар ва экспертлар жалб қилинган ҳолда олий таълим ва капитал қурилиш соҳаларида «коррупциясиз соҳа» лойиҳасини амалга ошириш юзасидан «Йўл харита»лари тасдиқланган. Олий таълим тизимида коррупцияга қарши курашишни такомиллаштириш ва «коррупциясиз соҳа» лойиҳасини амалга ошириш бўйича тасдиқланган «йўл харитаси» бўйича бир қатор самарали ишлар амалга оширилган. Мажлисда олий таълим, қурилиш ва соғлиқни сақлаш соҳаларида коррупцияга қарши курашиш борасидаги фаолиятда айрим камчиликлар мавжудлигига эътибор қаратилган.

Таъкидланишича, таҳлиллар сўнгги икки йилда таълим тизимида 326 нафар ходим таълим жараёни билан боғлиқ жиноятлар учун жавобгарликка тортилган. 317 нафар, яъни 97 фоиз ходим содир этган қилмишлар коррупциявий жиноят ҳисобланади.

Бундан ташқари, 91 та давлат олий ўқув юртларининг 40 таси ёки деярли ҳар иккинчисида раҳбар ёки профессор-ўқитувчилар томонидан таълимга алоқадор жиноят содир этилган. Мавжуд 970 та коллеж ва лицейлардан 131 таси, яъни 14 фоизида таълимга боғлиқ жиноятлар юз берган.

Сўнгги икки йилда соғлиқни сақлаш тизимидаги 581 нафар ходим турли жиноятларни содир қилганлиги учун жиноий жавобгарликка тортилган бўлиб, улардан 114 нафари, яъни ҳар тўртинчисининг содир қилган қилмиши коррупцион жиноят эканлигини маълум бўлди.

Мажлисда кўриб чиқилган масалалар юзасидан қўмитанинг тегишли қарори қабул қилинган.

Аввалроқ Олий Мажлис Сенати Мудофаа ва хавфсизлик масалалари қўмитасининг мажлисида бўлиб ўтгани, унда Тошкент оғир ва ўта оғир жиноят қайд этилиши бўйича республикада 1-ўринни эгаллагани тўғрисида хабар берилганди.