Бухоро вилояти Қоракўл туманида икки киши қурбон бўлган ЙТҲ содир бўлган ерга радар ўрнатилади. Бу ҳақда «Постда» нашри хабар берди.
Бухоро вилоятининг Қоракўл туманида 19 май куни одам ўлими билан якунланган ЙТҲ содир бўлган эди.
Ҳодиса соат 13:30 ларда 4Р-76 Қоракўл–Янгибозор–Жиғачи автомобиль йўлининг 7-километрида юз берган. 1989 йилда туғилган М.Ж. Nexia тезлигини меъёридан оширган ҳолда бошқараётиб, олдинда кетаётган автомобилни қувиб ўтиш мақсадида қарама-қарши йўналишга чиққан. Шу вақтда 1981 йилда туғилган Н.Т. бошқарувидаги Lacetti’нинг олд қисмига урилиб, ЙТҲ содир этган.
Бир йиллик ҳайдовчилик стажига эга бўлган М.Ж. ашаддий қоидабузар эканлиги аниқланган. Маълумотларга кўра у бир йил давомида 12 маротаба йўл ҳаракати қоидаларини бузган.
Сўнгги қоидабузарлиги натижасида олган тан жароҳати сабабли М.Ж. ЙТҲ содир бўлгандан бир кун ўтиб шифохонада вафот этган. Бу ЙТҲ натижасида 19 ёшли З.Н. исмли қиз ҳам ҳалок бўлган эди.
«Вилоят ИИБ ЙҲХБ ходимлари томонидан бу каби ҳодисаларнинг қайта такрорланмаслиги учун муҳим чоралар кўрилди. Хусусан, тезликни онлайн тартибда назорат қилиб борувчи радар ўрнатилиб, эндиликда мазкур ҳудудда ҳам тезкор рейдлар ўтказиб турилиши белгиланди», – дейилади ИИБ хабарда.
Аввалроқ Сурхондарёда «ВАЗ-2101» Malibu билан тўқнашиб ёниб кетиши натижасида «Жигули» ҳайдовчиси ва йўловчи вафот этгани, Сергелида 57 ёшли аёл, Шайхонтоҳурда 10 ёшли бола ЙТҲ оқибатида ҳалок бўлгани ҳақида хабар берилган эди.
Изоҳ (0)