Кореядан таътилга келиб, пандемия сабабли кетолмаётган фуқаролар чартер рейс орқали жўнаб кетгани ҳақида хабар берилган эди. 30 июнь куни бундай фуқароларнинг 29 кишидан иборат навбатдаги гуруҳи «Asiana» авиакомпаниясининг Тошкент—Инчон йўналишидаги чартер рейси орқали Кореяга жўнаб кетди. Бу ҳақда Ташқи меҳнат миграцияси агентлиги матбуот хизмати хабар берди.
Қайд этилишича, пандемия даврида Кореяга кириб боришга рухсат олиш учун розилик битимини тўлдиришдан олдин иш берувчи билан карантинда сақлаш жойини аниқлаштириш (иш берувчи хабарсиз қолмаслиги керак) ҳамда ҳаққоний маълумотларни розилик битимига киритиш, карантин жойи корхона жойлашган ҳудудда (шаҳарда) кўрсатилган бўлиши лозим. Иш берувчининг меҳнат мигрантини чақириш ҳақидаги ёзма розилик хати қўллаб-қувватланади.
Нотўғри берилган маълумотлар фуқаронинг Корея Республикасига кириб боролмаслигига ҳамда ушбу мамлакат ҳудудига кириш учун тақиқ қўйилишига сабаб бўлиши мумкин.
Таъкидланишича, агентлик ушбу хизматни бепул амалга оширмоқда.
30 июнь куни чартер рейси орқали Кореяга жўнаб кетди 29 нафар фуқаро HRД ташкилоти ва агентликнинг Кореядаги ваколатхонаси ходимлари томонидан кутиб олингач, уларга аэропортдаги белгиланган қатъий тартибдаги текширувлардан ўтишда амалий ёрдам кўрсатилган. Шундан кейин 14 кунлик мажбурий карантин талабларига риоя қилиш бўйича розилик битимида кўрсатилган манзилларига кузатиб қўйилган.
Изоҳ (0)