Ўзбекистон ва Жаҳон савдо ташкилоти июль ойидан мамлакатнинг мазкур ташкилотга аъзо бўлиши бўйича қўшма ишчи гуруҳ учрашувларини қайта бошлайди. Бу ҳақда Инвестициялар ва ташқи савдо вазирлиги хабар берди.
Маълум қилинишича, 2020 йилнинг 29 июнь куни Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов раҳбарлигида Жаҳон савдо ташкилоти билан ишлаш бўйича Идоралараро комиссиясининг 4-йиғилиши видеоконференция шаклида ўтказилди. Тадбирда Ўзбекистоннинг ЖСТга кириши бўйича музокаралар олиб бориш гуруҳи аъзолари ҳам иштирок этди.
Ўзбекистоннинг ЖСТга аъзо бўлиши бўйича ишчи гуруҳ 1998 йилда ташкил этилган эди. Кейинги йилларда ушбу ишчи гуруҳ фақат уч марта учрашди ва 2000 йилларнинг ўрталарига келиб бу борада халқаро экспертлар билан учрашувлар тўхтаб қолганди.
Учрашув давомида Ўзбекистоннинг ЖСТга кириши бўйича ишчи гуруҳининг бўлажак 4-йиғилиши билан боғлиқ масалалар муҳокама қилинди.
«Ҳозирги кундаги эпидемиологик вазиятни ҳисобга олган ҳолда, Ўзбекистон Республикасининг ЖСТга кириши бўйича ишчи гуруҳининг 4-йиғилиши 2020 йилнинг 7 июль куни «гибрид» шаклида ўтказилиши, яъни Женевадаги хорижий давлатларнинг дипломатик миссиялари делегациялари ташкилот штаб-квартирасининг мажлислар залида, эксперт гуруҳлари эса, шу жумладан, Ўзбекистон делегацияси, видеоконференция орқали иштирок этишига келишиб олинди», — дейилади вазирлик хабарида.
Вазирликнинг қайд этишича, ЖСТга аъзо бўлиш жараёни муҳим вазифа эканлиги ва мамлакатни ижтимоий-иқтисодий ривожлантиришнинг бир қатор омилларига таъсир этувчи масалалар мажмуасини тезкор ҳал этишни талаб қилиши алоҳида таъкидланди.
Аввалроқ Ўзбекистоннинг Жаҳон савдо ташкилотига аъзо бўлиши учун идоралараро комиссия тузилганди.
Изоҳ (0)