АОКА ҳузуридаги штабда Коронавирусга қарши кураш штаби аъзоси Ҳабибулла Оқилов иштирокида ўтказилган брифингда муҳим савол ва мурожаатлар юзасидан маълумотлар берилди.
Дорихоналарда коронавирусдан ҳимоя қиладиган қиммат бейж (вирус блокатор) сотилмоқда. Айтишларича, у 2 метр масофагача вирусдан ҳимоя қилармиш. Бейж сотиб олишга арзийдими?
«Вирус блокатор — Японияда кашф қилинган индивидуал бейж, ҳозирги вақтда Россия компаниялари ҳам уни ишлаб чиқармоқда. Кашфиётчиларнинг таъкидлашича, бейжга киритилган диоксид хлорид моддаси инсон атрофидаги ҳавони зарарсизлантиришга ва бактерия, вирус ва қўзиқоринларни йўқ қилишга ёрдам беради.
Афсуски, бундай баёнотлар бейжлар ҳақиқатдан ҳам инсон атрофида тозаликни таъминлашга қодирлигини далилловчи бирор асосланган илмий мақолага таянмаган. Диоксид хлор буғ шаклида А грипп вируси фаоллигини пасайтиради, бунинг учун уни сепиш керак, пластик ёки қоғозга киритиш эмас. Бундан ташқари, тажрибада моддани фақат битта касаллик қўзғатувчисида синовдан ўтказишган, ишлаб чиқарувчилар томонидан эса барча мавжуд микроорганизмлардан 99 фоизга ҳимоялаши айтилмоқда», — деган Ҳабибулла Оқилов.
Оқилов «Ўзбекистонда ПЗР тестлар фақатгина коронавирус қўзғатувчисини аниқлайдими ёки грипп ва бошқа инфекцияларни ҳам аниқлаши мумкинми?», — дея берилган саволга ҳам жавоб қайратган.
«ПЗР тест диагностикаси нафақат коронавирусни текширади, балки барча вирус ва бактерия қўзғатадиган юқумли касалликларни аниқлаб беради. Коронавирус ва грипп касаллиги ўхшаш, шунингдек, фарқли томонлари ҳам кўп, аммо грипп қўзғатувчисини ҳам ПЗР усули билан аниқлаб ажратиш мумкин», — деган штаб аъзоси.
Шунингдек, брифингда коронавируснинг енгил даражаси билан касалланган беморларнинг уйда даволаниши мумкинлиги ҳақидаги гап-сўзларга ҳам ойдинлик китирилди.
«Ҳақиқатдан, 5 июлдан бошлаб Ўзбекистонда коронавирусга чалинган беморларни даволашнинг янги тартиби жорий қилинади. Беморлар уч тоифага бўлинади:
- коронавирус инфекциясининг енгил даражаси билан касалланган беморлар (касаллик аломатларисиз);
- коронавирус инфекциясининг ўрта даражаси билан касалланган беморлар (юқори тана ҳарорати);
- оғир даражадаги беморлар.
Вирус тасдиқланган беморлар билан мулоқотда бўлган фуқаролар 14 кунлик карантинни уйда ёки меҳмонхонада ўтказишлари мумкин.
ИИВ, Миллий гвардия ҳамда Маҳалла ва оилани қўллаб-қувватлаш вазирлиги ходимлари уй шароитида даволанаётганларни назорат қилишади. Қоидабузарлар жавобгарликка тортилади», — дейди Ҳабибулла Оқилов.
23 июнда Ўзбекистон аҳолисида коронавирусга қарши антитанани аниқлаш бўйича тест ўтказилиши, кунларнинг исиши коронавируснинг йўқ бўлишига қандай таъсир этиши маълум қилингани ҳақида хабарлар берилган.
Изоҳ (0)