Эроннинг суд ҳокимияти АҚШ президенти Дональд Трамп ва яна 30 кишини қамоққа олиш ҳақида ордер берди. Расмий Теҳроннинг фикрича, Трамп ва мазкур 30 нафар шахс 2020 йилнинг 3 январь куни Эрон ислом инқилоби муҳофизлари корпуси «Ал-Қудс» махсус бўлинмаси генерали Қосим Сулаймонийнинг ўлдирилишида жавобгар ҳисобланади. Бу ҳақда «Интерфакс» хабар берди.
Теҳрон прокурори Али Меҳрнинг сўзларига кўра, Трамп ва бошқа шахслар «қотиллик ва терроризм»да айбланмоқда. Бироқ прокурор Эрон Трамп билан бирга яна кимларни ҳибсга олишни истаётганига аниқлик киритмаган.
Унинг қайд этишича, Эрон ҳатто Трамп президентлик лавозимини тарк этганидан кейин ҳам адолатни тиклашни режалаштирмоқда.
Прокурорнинг маълум қилишича, Эрон Интерполдан Трамп ва Сулаймонийнинг ўлимида айбланаётганларни қўлга олиш учун «қизил огоҳлантириш»ни ёқишни, яъни бу ишга энг юқори устунлик беришни сўраган.
Бироқ Интерпол томонидан ҳозирча Эрон ҳукуматининг сўровига ҳеч қандай изоҳ берилмаган.
Трампнинг буйруғига кўра, 2020 йилнинг 3 январь куни генерал Қосим Сулаймоний Бағдодда ўлдирилган. АҚШ президенти Сулаймонийни террорчи деб атаган, Эрон генералнинг ўлими учун ўч олишга ваъда берган. Бу воқеа ортидан Эрон 2015 йил июлида имзоланган ядровий келишувдан тўлиқ чиққанини эълон қилди.
8 январга ўтар кечаси Эрон АҚШнинг Ироқдаги ҳарбий базаларига ракета зарбалари берган. Ракета зарбалари бериш чоғида Теҳрондан ҳавога кўтарилган «Украина халқаро авиалиниялари» компаниясининг Boeing 737 самолёти хатолик сабабли уриб туширилган. Самолёт бортида бўлган 176 киши ҳалок бўлган.
Шундан сўнг, АҚШ Эронга қарши янги санкцияларни жорий қилди. Эронда эса Трампни ўлдириш учун 3 миллион доллар мукофот эълон қилинди.
Кейинроқ Эронда генерал Сулаймонийнинг ортидан жосуслик қилишда айбланган фуқаро ўлимга ҳукм қилинди.
Изоҳ (0)