Эндиликда хориж фуқаролари Россияда патент ёки ишлаш учун рухсатнома олиш, вақтинча рўйхатдан ўтишга ариза бериш учун биринчи навбатда COVID-19 учун текширувдан ўтиши керак. Россия Соғлиқни сақлаш вазирлигининг бу борадаги тегишли буйруғи эълон қилинди.
Буйруқ билан янги турдаги коронавирус инфекцияси тегишли касалликлар рўйхатига киритилган. Энди агар ушбу инфекция аниқланса, бошқа давлатлар фуқароларига Россияда яшаш ва ишлаш имконияти рад этилади.
Коронавирусдан ташқари, ушбу рўйхатга ОИВ, сил, сифилис (захм) ва мохов касаллиги ҳам киритилган.
Буйруқда ёзилишича, Россияда қонуний бўлиш учун чет элликлар юқумли касалликлар бўйича шифокорга бориши ва нуклеин кислотасини кучайтириш усулларидан фойдаланган ҳолда COVID-19’га лаборатория текширувидан ўтиши керак, яъни коронавирус учун ПЗР тестини топшириш лозим.
Коронавирус пандемияси сабаб Россиядаги чет эл фуқаролари ва фуқаролиги бўлмаган шахслар учун бир қатор енгилликлар тақдим этилган эди. Хусусан, мамлакатдаги меҳнат муҳожирларининг иш патенти муддати дастаб 15 июнгача, кейинроқ 15 сентябрга қадар узайтирилган эди.
Изоҳ (0)