Шавкат Мирзиёев Наманган шаҳридаги «Орзу» маҳалла фуқаролар йиғинида «Обод ва хавфсиз маҳалла» концепцияси асосида амалга оширилган ишлар билан танишди. Бу ҳақда Президент матбуот хизмати хабар қилган.
Хабарда «Орзу» МФЙ 2013 йилда ташкил топгани, мазкур маҳаллада намунавий лойиҳалар асосидаги 830 та ҳамда якка тартибдаги 1 минг 682 та уй мавжудлиги, қарийб 12 ярим минг аҳоли ҳаёт кечираётгани қайд этилган.
Мирзиёев 2017 йилда вилоятга ташрифи чоғида бу ерда бўлиб, «Орзу» маҳалласи мисолида аҳолига қулайликлар яратиш ва хавфсизлигини таъминлаш бўйича бутун мамлакатга намуна бўладиган тизим тақдимоти билан танишган.
«Ҳудудда ташкил этилган ‘Орзу’ кичик саноат зонасида 15 та лойиҳа ишга туширилиб, 930 дан зиёд иш ўрни яратилган. Шундан қарийб 400 тасига маҳалла фуқаролари жойлашди. Битта боғча, 650 ўринли мактаб, дорихона, савдо ва умумий овқатланиш шохобчалари, фитнес клуби, мини-футбол майдони барпо этилди. Ўтган йили давлат хизматчилари учун 20 та хизмат уйи қуриб берилган», – дейилади Президент матбуот хизмати ахборотида.
Президент Наманган шаҳрининг ижтимоий-иқтисодий геоахборот мониторинг ва рақамли бошқарув тизими билан танишиб, энг катта масала жиноятчиликни камайтиришга эришиш эканини таъкидлади.
Янги тизимнинг мақсади шаҳардаги ижтимоий-иқтисодий вазиятни узлуксиз ўрганиб бориш, кундалик назорат қилиш, муаммоли ҳолатларни дастурдаги таҳлилий маълумотлар асосида тезкор бартараф этиш, қарор қабул қилишда юқори самара берувчи янги инновацион онлайн бошқарув усулига ўтишдан иборат.Мазкур тизимда барча кўрсаткичлар геохарита орқали мониторда акс этади. Жумладан, аҳоли сони, ёлғиз кексалар, таълим муассасалари, меҳнат бозори, инвестициявий лойиҳалар, камбағал оилалар, криминоген муҳит каби маълумотлар узлуксиз киритиб борилади.
Мавзуга доир: Поп ва Чустда жун етиштириш ва қайта ишлаш кластери тузилади, 1,5 минг хонадонга 20 мингта қўй ва эчки тарқатилади
Шавкат Мирзиёев вилоятдаги ёшлар ва жиноятга мойил қатламни секторлар томонидан назоратга олиш ва шу орқали жиноятчиликни жиловлаш бўйича ҳали тизимли ишлар қилинмаётганига эътибор қаратди. Ички ишлар вазирлиги, Миллий гвардия, Бош прокуратура мутасаддиларига маҳаллаларда тинчликни таъминлашга тўсқинлик қилаётган омилларни ўрганиш, секторлар ишлаши учун қонунчиликка тегишли меъёрларни киритиш юзасидан топшириқлар берилди.
Аҳоли билан ишлаш учун психолог кадрлар тайёрлашни кенгайтириш, жиноят содир этилишига сабаб бўлаётган омилларни бартараф этиш юзасидан чора-тадбирлар белгиланди.
Наманганда жиноятчиликнинг олдини олиш юзасидан вилоят секторлари раҳбарларининг ахборотлари тингланди, дейилади хабарда.
Мавзуга доир:
Изоҳ (0)