Фарғонада 22 ёшли С.А. бошқарувидаги Nexia’ни тўхтатиб, унинг ичидан катта миқдордаги пул ва ҳайдовчининг телефонини талончилик йўли билан тортиб олган жиноий гуруҳ вакиллари ушланди. Бу ҳақда ИИВ ҳузуридаги Тергов департаменти хабар қилган.
2020 йилнинг 23 июнь куни соат 23:45 да 22 ёшли С.А. бошқарувидаги Nexia Қўқон—Бувайда автомобиль йўлида Учкўприк тумани Калтатой қишлоғи ҳудудига етиб келган вақтида номаълум шахслар томонидан кул ранг Nexia-1’да тўхтатилган. Талончилар ҳайдовчини уриб, автомашина салонидан 36 миллион 700 минг сўм пул ҳамда баҳоси 1 миллион 600 минг сўмлик Redmi-7 телефонини талон-торож қилиб, ҳодиса жойидан яширинган.
Тезкор суриштирув ишлари давомида мазкур жиноятни 32 ёшли М.А., 24 ёшли Ж.Ж., 21 ёшли Ж.Й. ва М.У. (21 ёшли аёл) содир этгани аниқланган. Ж.Ж.дан Redmi-7 русумли уяли алоқа воситаси ашёвий далил тариқасида олинган.
Мазкур ҳолат юзасидан Учкўприк тумани ИИБ ҳузуридаги Тергов бўлими томонидан Жиноят кодексининг 166-моддаси 2-қисми «б,в» бандлари (Талончилик) билан жиноят иши қўзғатилган. Жиноятни содир этган барча шахслар гумон қилинувчи тариқасида ишда иштирок этишга жалб қилинган.
Изоҳ (0)