Ўзбекистонда 25 июнь куни коронавирус қайд этилган 276 нафар бемордан 24 нафари аҳоли орасида тасдиқланиб, шундан 17 ҳолатда касаллик Тошкент шаҳрида аҳоли орасида аниқланди. Соғлиқни сақлаш вазирлиги пойтахтда қайд этилган мазкур ҳолатлар ҳақида маълумот берди.
Эслатиб ўтамиз, 24 июнь куни Тошкент шаҳрининг бешта туманида аҳоли орасида 18 кишида коронавирус аниқланганди. 25 июнь куни бир кун аввалгига нисбатан битта кам ҳолат аниқланди.
Жумладан, Тошкент шаҳридаги Сергели тумани ҳокимлиги ходими А.Т. профилактик мақсадда намуна топширганда, унда коронавирус тасдиқланган. «Ўзбекнефтгаз» АЖ ходими А.Қ. ҳам профилактик текширув давомида коронавирусга чалингани аниқланган. Республика шошилинч тиббий ёрдам илмий маркази санавиация ходими С.У. коронавирусга гумон қилинган беморларга тиббий хизмат кўрсатган ва унда инфекция қайд этилган.
Шунингдек, Учтепа туманида яшовчи 2 нафар фуқаро тана ҳарорати юқорилиги сабабли шифохонага мурожаат қилган ва уларда коронавирус борлиги маълум бўлган. Шайхонтоҳур туманида яшовчи С.З. ҳамда Олмазор туманида яшовчи Р.А. тана ҳарорати кўтарилганлиги сабабли поликлиникага мурожаат қилган ва олинган таҳлил уларда вирус борлигини кўрсатган. Чилонзор туманида яшовчи сантехник У.И.да ҳам коронавирус инфекцияси аниқланган.
«Соғлиқни сақлаш вазирлиги аҳоли орасида коронавирусга чалиниш ҳолатлари кўпайганлиги сабабли пойтахтимиз аҳолиси ва меҳмонларини карантин ва санитария қоидаларига қатъий амал қилишларини сўраб қолади», — дейилади вазирлик хабарида.
Изоҳ (0)