Ўзбекистонда хизмат кўрсатган фан арбоби, мамлакатда биофизика фанига асос солган етук олим, ёзувчи Ойбекнинг фарзанди бўлган Бекжон Тошмуҳаммедов 85 ёшида оламдан ўтди. Бу ҳақда Фанлар академияси хабар берди.
«Биофизиканинг Ўзбекистондаги асосчиларидан бири, дунё миқёсида танилган йирик олим, Ўзбекистон Фанлар академияси академиги Бекжон Тошмуҳамедов 85 ёшида оламдан ўтди. Атоқли олим, меҳрибон устоз, камтарин инсон Бекжон Тошмуҳамедовнинг хотираси қалбларимизда ҳамиша сақланиб қолади», — дейилади хабарда.
Фанлар академияси марҳумнинг оила аъзолари ва яқинларига чуқур ҳамдардлик билдирган.
Бекжон Тошмуҳаммедов 1935 йил 27 январда Тошкентда ёзувчи Ойбек хонадонида туғилган. 1958 йилда Москва давлат университетини тамомлаган. Тошкент давлат университетида кичик илмий ходим, биокимё ва биофизика кафедраси доценти, Ўзбекистон ФА ядро физикаси ва биокимё институти биофизика лабораторияси мудири бўлиб ишлаган.
Шунингдек, у ТошДУ (ҳозирги ЎзМУ) биофизика ва атроф-муҳит муҳофазаси кафедраси мудири, Ўзбекистон ФА Физиология институтида директор, бўлим бошлиғи, Олий аттестация комиссияси раиси, Ўзбекистон ФА Президиуми аъзоси бўлган.
Изоҳ (0)