АҚШ президенти Дональд Трамп давлат органларига ёдгорликлар ва бошқа федерал мулкларга зарар етказаётганларнинг барчасини қўлга олиш ва уларни 10 йилгача озодликдан маҳрум этиб жазолашга рухсат берди. Бу ҳақда Америка етакчиси ўзининг Twitter’даги саҳифаси орқали маълум қилди.
«Мен федерал ҳукуматга вандализм билан шуғулланаётган, ёдгорликлар, ҳайкаллар ва АҚШнинг бошқа федерал мулкларини бузаётганларнинг барчасини ҳисбга олиш ва уларни ветеранларнинг ёдгорликларини сақлаш тўғрисидаги ҳамда ушбу масалага тегишли бошқа қонунларга мувофиқ 10 йилгача озодликдан маҳрум этишга рухсат бердим», — деб ёзади Трамп.
АҚШ президентининг таъкидлашича, мазкур қарор ҳозирда кучга кирган. Унинг сўзларига кўра, янги қоидадан эски сана билан фойдаланишга рухсат берилган.
Эслатиб ўтамиз, май ойи охирида афроамерикалик Жорж Флойдни Миннеаполисда полиция ходимлари қўлга олган ва кўчада бир нафар ходим томонидан тизза билан бўғиб қийноққа солинган, якунда Флойд касалхонада вафот этган. Унинг ўлими АҚШ ҳамда Европада ирқчилик ва ижтимоий тенгсизлик муаммоларига қарши норозилик намойишларининг бошланишига туртки бўлди.
Мавзуга доир:
Миннесота штатидаги Сент-Пол шаҳрида Христофор Колумб ҳайкали шундай ҳужумга учраган. Массачусетсдаги Бостон шаҳрида эса Америка қитъаси очган саёҳатчининг боши синдириб ташланди. Ричмондда Америка конфедератив штатлари президенти Жефферсон Дэвиснинг ҳайкалига вандаллар томонидан зарар етказилган. Бельгия, Буюк Британия, Франция каби давлатларда ҳам қулдорлик рамзи ҳисобланган тарихий шахсларнинг ҳайкаллари вандализм қурбони бўлмоқда.
Изоҳ (0)