Россия пойтахти Москва шаҳрида Иккинчи жаҳон урушида қозонилган ғалабанинг 75 йиллиги муносабати билан ўтказилаётган Ғалаба парадида иштирок этиш учун ташриф буюрган Қирғизистон делегацияси аъзолари орасида коронавирус аниқланди. Бу ҳақда Қирғизистон президенти матбуот хизмати хабар берди.
Маълум қилинишича, Москвага учиб келгач, белгиланган талабларга биноан Қирғизистон президенти, унинг делегацияси аъзолари ва кузатувчилар коронавирусга тест топширган.
Қирғизистон президенти аппаратининг ташқи сиёсат бўлими раҳбари Дониёр Сидиқов ва қўриқлаш хизмати ходимининг коронавирус тестлари ижобий натижа берган.
Шу сабабли, Қирғизистон президенти Сўронбой Жээнбеков парадда иштирок этмаяпти.
«Gazeta.uz»нинг ёзишича, Қирғизистон Қуролли кучлари бўлинмаси бошқа хорижий давлатларнинг парад бўлинмалари қаторида Қизил майдондан саф билан ўтган.
Эслатиб ўтамиз, Ўзбекистон Президенти Шавкат Мирзиёев мазкур парадда қатнашиш учун 23 июнь куни Москвага етиб борди. Шу куни Шавкат Мирзиёев Россия президенти Владимир Путин билан учрашди. Ўзбекистон президенти айни пайтда парадда иштирок этмоқда.
Маълумот учун, Владимир Путин Москвада ўтадиган Ғалаба парадига барча МДҲ давлатлари раҳбарларини таклиф қилган. Озарбайжон президенти Илҳом Алиев, Арманистон бош вазири Никол Пашинян мамлакатларидаги эпидемиологик вазият туфайли, Туркманистон президент Гурбангули Бердимуҳамедов 29 июнда 63 ёш — Пайғамбар ёшига тўлиши сабаб тантанали тадбирларга бора олмаслигини эълон қилган. Қозоғистоннинг биринчи президенти Нурсултон Назарбоев эса коронавирус юқтириб олган ва у ҳам Москвага бормаган.
Изоҳ (0)