Хитой ҳукумати вакиллари билан алоқада бўлган хитойликлар Дональд Трампни АҚШ президенти этиб қайта сайлаш кампанияси учун маблағ тўплаётган Trump Victory фондига юз минглаб доллар миқдорида сармоя киритган. Бу ҳақда The Wall Street Journal (WSJ) хабар бермоқда.
Нашр маълумотларига кўра, фонд ҳисоб рақамига 2017 йили Хитойнинг тўрт нафар фуқаросидан пул келиб тушган. Улар сармоя киритиш йўли билан Республикачилар партияси қурултойида иштирок этиш учун таклифномани қўлга киритишни ва келгусида, эҳтимол, унга таъсир кўрсатиш мақсадида Трамп билан яқинлашишни хоҳлаган бўлиши мумкин, деб ёзади нашр.
WSJ маълумотларига кўра, Trump Victory ҳисобига пул ўтказганларнинг айримлари Хитой давлат хавфсизлик хизмати девони, хусусан, қуролли кучларга алоқадор ташкилотлар аъзолари билан яқин алоқада бўлган. Нашрнинг ёзишича, бу одамлар хитойлик машҳур сиёсий арбобларни Трампга яқинлашиш борасида муваффақиятга эришаётганликлари ҳақида хабардор қилган ўринлари ҳам бўлган.
Мақолада қайд этилишича, фондга катта маблағни хайрия қилган хитойликларнинг уч нафари — улар орасида Хитой марказий ҳукуматида ишловчи шахс ҳам бўлган — 2017 йил май ойида Республикачилар партияси Миллий қўмитасининг Калифорния штатидан вакили бўлган Шон Стил томонидан АҚШда ташкил этилган ёпиқ учрашувда меҳмон бўлган. Унда, таъкидланишича, республикачиларнинг сайловолди кампанияларини ўтказиш, шунингдек, партиянинг бошқа ички масалалари муҳокама қилинган.
Республикачилар партияси Миллий қўмитаси WSJ’нинг сўровларига жавобан, ўша учрашувдан сўнг Шон Стилга «сиёсатимизни ноқонуний ташқи аралашувлардан» ҳимоя қилиш мақсадида Хитой фуқаролари билан алоқаларни тўхтатиш ҳақида топшириқ берилганини маълум қилган. Қўмитанинг қайд этишича, партия фонд ҳисоб рақамига ўтказилган пулларни қайтариб бермоқчи эмас, чунки улар сайловолди кампанияларини молиялаштириш қоидаларига зид эмас.
Мақола муаллифлари хитойликлар томонидан Trump Victory фондига пул маблағларининг ўтказилиши билан боғлиқ қоидабузарликларни аниқлай олмаган. Бундан ташқари, WSJ’нинг алоҳида қайд этишича, Трампнинг ўзи бундай хайриялардан бехабар қолган бўлиши эҳтимоли юқори. Оқ уй газетанинг сўровларига жавоб бермаган.
Изоҳ (0)