Тошкент шаҳридаги 10-сонли Яккасарой тумани тез тиббий ёрдам бўлимининг коронавирус инфекциясига қарши ташкил этилган махсус бригадаси шифокори Шерали Баҳронов қўшимча тўловлар тўланмаётганини маълум қилди. Бу ҳақда «Kun.uz» хабар берди.
«2020 йилнинг 31 мартидан 20 июнигача коронавирус инфекциясига чалинган беморлар билан мулоқотда бўлиб, уларни Вирусология институти клиникаси, Эпидемиология, микробиология ва юқумли касалликлар илмий текшириш институти клиникаси, Тошкент тиббиёт академияси 2-клиникаси, 1-сонли шаҳар клиник шифохонаси ҳамда Терапия ва реабилитация илмий-амалий текшириш марказига бевосита ётқизишда иштирок этдим. Аммо Президентимизнинг 2020 йил 19 мартдаги ПФ-5969 сонли фармони ҳамда 2020 йил 26 мартдаги ПҚ-4652 сонли қарори ва Республика махсус комиссиясининг 2020 йил 30 апрелдаги 20-сонли йиғилиш баённомаси билан тасдиқланган вақтинчалик низомга асосан ҳалигача 6 фоизлик қўшимча тўлов ва махсус тўловни ололганимиз йўқ», — дея маълум қилган шифокор.
Шунингдек, шифокор мазкур масалада Президент порталига икки марта мурожаат қилганини, бироқ ҳеч қандай ижобий натижа бўлмаганини билдирган.
Ўзбекистон Президентининг 2020 йил 19 мартдаги ПФ-5969-сонли фармонининг 17-бандида Молия вазирлиги, Бандлик ва меҳнат муносабатлари вазирлигига Соғлиқни сақлаш вазирлиги билан биргаликда тиббиёт, санитария-эпидемиологик ва бошқа ходимлар коронавирус инфекцияси тарқалишига қарши курашиш тадбирларига жалб қилинадиган даврда уларнинг ойлик лавозим маошига 6 фоиз миқдорида ҳар кунлик қўшимча тўловлар жорий қилиш белгиланган.
Бундан ташқари, Президентнинг 2020 йил 26 мартдаги ПҚ-4652-сонли қарорида коронавирус инфекциясидан зарарланган беморлар билан мулоқотга киришадиган шифокор ходимларга ҳар 14 кунлик фаолият даври учун 25 миллион сўм (солиқлардан ташқари) махсус қўшимча рағбатлантириш тўлови амалга оширилиши белгиланган.
Аввалроқ Ўзбекистонда коронавирусга қарши курашаётган тиббиёт ходимларига миллиардлаб сўм пул вақтида тўланмагани аниқланганди. Бунинг ортида Самарқанд вилоятида мазкур тўловларни кечиктирган ходим ишдан олинган.
Эслатиб ўтамиз, Ўзбекистонда коронавирус инфекциясидан зарарланган беморлар билан мулоқотга киришадиган, зарарланган беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт ходимларига ҳар 14 кунлик фаолият даври учун махсус қўшимча рағбатлантириш тўлови белгиланган. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.
Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)