Воронеж области ҳакамлик суди GM Uzbekistan автоконцернининг собиқ бош директори, Воронеждаги Uz-Daewoo автомобиллари дилери ва «Км/ч» автосалонлар тармоғининг собиқ эгаси, ҳудудда банкротлик эълон қилган Тоҳиржон Жалиловнинг 500 миллион рублга яқин қарздорлигини кредиторлар реестрига киритди, деб хабар беради «Коммерсантъ»
«Возрождение» банки бизнесменнинг кредиторлар талаблари реестрига бир нечта кредит шартномалари, қарз фоизлари ва комиссиялар бўйича 209,68 миллион рубль киритганди.
Санкт-Петербургдаги «Аудиторско-консалтинговая юридическая фирма «Объединенная юридическая коллегия» МЧЖ кафиллик шартномаси бўйича 299,22 миллион рубль қарз билан Жалиловнинг банкротлигига қўшилди.
«Ўзбекозиқовқатхолдинг» компанияси сайтидаги маълумотларга кўра, Тоҳир Жалилов 1990 йилларда UzDEUavto компаниясида ишлаган, шу жумладан, 2003 йилгача компанияни бошқарган.
Кейин эса UzDEUavto Саратов ёпиқ акциядорлик жамиятининг бош директори этиб тайинланган. Бир вақтнинг ўзида, 2004—2006 йилларда Киевда «Укр-Ўзавто» МЧЖ бош директори вазифасини бажарувчи бўлган. 2007—2009 йилларда ўриндошлик асосида «ЎзавтоРус» МЧЖ директори вазифасини бажарувчи лавозимида ҳам ишлаган.
2009—2010 йилларда Тоҳир Жалилов General Motors Uzbekistan’нинг маркетинг, савдо ва хизмат кўрсатиш бўйича бошқарувчи директори лавозимида ишлаган. 2010—2017 йилларда у «Ўзавтосаноат» АЖ раиси ўринбосари, бир вақтнинг ўзида GM Uzbekistan бош директори лавозими эгаллаган. 2017 йилдан буён Тоҳир Жалилов «Ўзбекозиқовқатхолдинг» компаниясига раҳбарлик қилмоқда.
Изоҳ (0)