Ўзбекистон Ташқи ишлар вазирлиги коронавирус инфекцияси билан касалланиш ҳолатлари камайган мамлакатларга мунтазам рейсларни қайта тиклаш устида иш олиб бормоқда. Бу ҳақда вазирлик матбуот хизмати хабар берди.
«Ташқи ишлар вазирлиги тезкор штабига кўра, санитария-эпидемиологик вазият барқарор бўлган ҳамда коронавирус инфекцияси билан касалланиш ҳолатлари камайган мамлакатларга мунтазам рейсларни қайта тиклаш устида иш олиб борилмоқда («яшил» ва «сариқ» рейслар)», — дейилади хабарда.
Қайд этилишича, ўзбекистонликларни чартер рейсларда олиб келиш давом этмоқда.
Эслатиб ўтамиз, 13 майдан 24 майгача хориждаги ўзбекистонликларни олиб келиш учун 12 та рейс амалга ошириш белгиланган ва режага асосан амалга оширилганди. 25—31 май кунлари 8 та чартер рейс амалга оширилган ҳамда Россия ва Туркиядан жами 2118 нафар фуқаро Ўзбекистонга олиб келиниши хабар қилинганди. Шунингдек, 1—7 июнь кунлари хориждаги ўзбекистонликларни олиб келиш учун 9 та чартер қатнови, 8—21 июнь кунлари оралиғида 20 та чартер рейс амалга оширилган.
Республика махсус комиссиясининг қарорига мувофиқ хориждаги фуқароларни Ўзбекистонга олиб келиш учун 2020 йилнинг 22 июнидан 5 июлигача 21 та чартер рейс амалга ошириш режалаштирилган.
Изоҳ (0)