Toshkent shahridagi 10-sonli Yakkasaroy tumani tez tibbiy yordam bo‘limining koronavirus infeksiyasiga qarshi tashkil etilgan maxsus brigadasi shifokori Sherali Bahronov qo‘shimcha to‘lovlar to‘lanmayotganini ma’lum qildi. Bu haqda “Kun.uz” xabar berdi.
“2020-yilning 31-martidan 20-iyunigacha koronavirus infeksiyasiga chalingan bemorlar bilan muloqotda bo‘lib, ularni Virusologiya instituti klinikasi, Epidemiologiya, mikrobiologiya va yuqumli kasalliklar ilmiy tekshirish instituti klinikasi, Toshkent tibbiyot akademiyasi 2-klinikasi, 1-sonli shahar klinik shifoxonasi hamda Terapiya va reabilitatsiya ilmiy-amaliy tekshirish markaziga bevosita yotqizishda ishtirok etdim. Ammo Prezidentimizning 2020-yil 19-martdagi PF-5969 sonli farmoni hamda 2020-yil 26-martdagi PQ-4652 sonli qarori va Respublika maxsus komissiyasining 2020-yil 30-apreldagi 20-sonli yig‘ilish bayonnomasi bilan tasdiqlangan vaqtinchalik nizomga asosan haligacha 6 foizlik qo‘shimcha to‘lov va maxsus to‘lovni ololganimiz yo‘q”, — deya ma’lum qilgan shifokor.
Shuningdek, shifokor mazkur masalada Prezident portaliga ikki marta murojaat qilganini, biroq hech qanday ijobiy natija bo‘lmaganini bildirgan.
O‘zbekiston Prezidentining 2020-yil 19-martdagi PF-5969-sonli farmonining 17-bandida Moliya vazirligi, Bandlik va mehnat munosabatlari vazirligiga Sog‘liqni saqlash vazirligi bilan birgalikda tibbiyot, sanitariya-epidemiologik va boshqa xodimlar koronavirus infeksiyasi tarqalishiga qarshi kurashish tadbirlariga jalb qilinadigan davrda ularning oylik lavozim maoshiga 6 foiz miqdorida har kunlik qo‘shimcha to‘lovlar joriy qilish belgilangan.
Bundan tashqari, Prezidentning 2020-yil 26-martdagi PQ-4652-sonli qarorida koronavirus infeksiyasidan zararlangan bemorlar bilan muloqotga kirishadigan shifokor xodimlarga har 14 kunlik faoliyat davri uchun 25 million so‘m (soliqlardan tashqari) maxsus qo‘shimcha rag‘batlantirish to‘lovi amalga oshirilishi belgilangan.
Avvalroq O‘zbekistonda koronavirusga qarshi kurashayotgan tibbiyot xodimlariga milliardlab so‘m pul vaqtida to‘lanmagani aniqlangandi. Buning ortida Samarqand viloyatida mazkur to‘lovlarni kechiktirgan xodim ishdan olingan.
Eslatib o‘tamiz, O‘zbekistonda koronavirus infeksiyasidan zararlangan bemorlar bilan muloqotga kirishadigan, zararlangan bemorlar joylashtirilgan obyektlarda hamda koronavirus infeksiyasini aniqlash laboratoriyalarida faoliyat olib borayotgan tibbiyot xodimlariga har 14 kunlik faoliyat davri uchun maxsus qo‘shimcha rag‘batlantirish to‘lovi belgilangan. Shuningdek, bemorlar bilan ishlash davomida koronavirus infeksiyasini yuqtirib olgan tibbiyot, sanitariya-epidemiologiya xizmati va boshqa xodimlarga 100 million so‘mdan to‘lanadi.
Koronavirus infeksiyasiga qarshi kurashish doirasida bemorlar bilan ishlagan vaqtida koronavirus infeksiyasini yuqtirish natijasida og‘ir ahvolga tushgan va sog‘lig‘i tiklanmagan taqdirda tibbiyot, sanitariya-epidemiologiya xizmati va boshqa xodimlarga yoki ularning oila a’zolariga esa 250 million so‘m miqdorida bir martalik to‘lovlar to‘lanadi.
Izoh (0)