Қозоғистонда коронавирусга чалинганлар сони 18 765 кишига, Қирғизистонда эса 3726 кишига етди

Қозоғистонда ўтган бир сутка ичида яна 534 кишида коронавирус аниқланди, деб хабар беради Tengrinews.

Мамлакат бўйлаб касаллар сонининг ортиши 2,9 фоизни ташкил этмоқда. Коронавирусга чалиниш бўйича янги ҳолатлар қуйидаги ҳудудларда аниқланган:

• Нур-Султон шаҳри — 77 (2,3 фоиз);
• Атирау вилояти — 65 (4,4 фоиз);
• Шарқий Қозоғистон вилояти — 47 (10,2 фоиз);
• Чимкент шаҳри — 47 (3,5 фоиз);
• Қарағанда вилояти — 43 (2,2 фоиз);
• Олмаота шаҳри —41 (1,2 фоиз);
• Ғарбий Қозоғистон вилояти — 35 (3 фоиз);
• Туркистон вилояти — 34 (5,5 фоиз);
• Шимолий Қозоғистон вилояти — 25 (10,2 фоиз);
• Олмаота вилояти — 23 (3,9 фоиз);
• Ақмўла вилояти — 19 (5,4 фоиз);
• Ақтўбе вилояти — 18 (2,8 фоиз);
• Павлодар вилояти — 14 (2,7 фоиз);
• Манғистов вилояти — 13 (3 фоиз);
• Қизилўрда вилояти — 12 (2,1 фоиз);
• Костанай вилояти — 11 (3,1 фоиз);
• Жамбил вилояти — 10 (1,6 фоиз).

Бутун мамлакат бўйлаб коронавирусга чалинганлар сони 18 765 кишига етган. Ҳозирга қадар 11 514 киши соғайган, 134 киши вирус қурбонига айланган. Шунингдек, 11 721 киши коронавирусни белгисиз ташувчи сифатида қайд этилган.Қирғизистонда 24 июнь ҳолатига кўра, яна 207 кишида коронавирус инфекцияси аниқланди. Бу ҳақда мамлакат Соғлиқни сақлаш вазирлигига таяниб, Kloop хабар берди.

Коронавирусга чалинган янги касалларнинг 92 нафари Бишкек шаҳри ҳисобига тўғри келмоқда. Шунингдек, қуйидаги ҳудудларда ҳам коронавирус билан касалланиш бўйича янги ҳолатлар қайд этилган:

• Чуй вилояти — 35;
• Ўш вилояти — 28;
• Ўш шаҳри — 43;
• Норин вилояти — 5;
• Жалолобод вилояти — 1;
• Иссиқкўл вилояти — 2;
• Талас вилояти — 1.

Бутун мамлакат бўйлаб COVID-19 билан касалланганлар сони 3726 кишига етди, уларнинг 42 нафари вирус қурбонига айланган. Ҳозирга қадар 2082 нафар бемор даволанишга муваффақ бўлган.

Афғонистонда ўтган бир сутка ичида яна 324 кишида коронавирус аниқланди, деб хабар беради Tolo News.

Мамлакат Соғлиқни сақлаш вазирлигининг маълумотларига кўра, Афғонистонда коронавирусга чалинганлар сони 29 481 кишини ташкил этмоқда.

Бутун мамлакат бўйлаб коронавирус оқибатида вафот этганларнинг жами сони 618 кишига етди, ҳозирга қадар 9260 бемор даволанишга муваффақ бўлди. Ўтган бир сутканинг ўзида 419 киши соғайган, ҳозирга қадар Афғонистонда коронавирусга қарши 66,8 мингдан ортиқ тест ўтказилган.

Тожикистонда коронавирус билан касалланганлар сони 5567 кишига етди, деб хабар беради «РИА Новости». Ўтган сутка давомида яна 54 кишида коронавирус аниқланган.

Мамлакатда ўтган бир сутка ичида 70 кишига шифохонадан жавоб берилган.

Тожикистонда ҳозирга қадар 54 киши COVID-19 қурбонига айланган, 4109 бемор даволанишга муваффақ бўлган.

Ўзбекистонда 24 июнь соат 10:00 ҳолатига кўра, коронавирусга чалинганлар сони 6755 нафарга етди. Мамлакатда ҳозиргача коронавирусга чалинганларнинг 4560 нафари (68 фоизи) соғайган, 19 нафар бемор эса касаллик асоратлари оқибатида вафот этган.