Путин Ғалаба парадига келгани учун Мирзиёевга миннатдорлик билдирди (видео)

Россия президенти Владимир Путин Ўзбекистон давлат раҳбари Шавкат Мирзиёевнинг Москвада бўлиб ўтадиган Ғалаба парадига келгани учун миннатдорлик билдирди. Бу ҳақда Президент матбуот хизмати хабар берган.

Шавкат Мирзиёев ҳамда Россия президенти Владимир Путин суҳбат чоғида стратегик шериклик ва кўп қиррали ҳамкорлик муносабатларини янада мустаҳкамлаш масалаларини муҳокама қилган.

Владимир Путин Ўзбекистон Қуролли Кучлари вакиллари мустақил Ўзбекистон тарихида илк бор 24 июнь куни Қизил майдонда бўлиб ўтадиган парадда иштирок этиши ҳақида сўз юритиб, «бу ўзига хос иттифоқчилик муносабатларининг яққол намойиши» эканини таъкидлаган.

Россия президенти Ўзбекистон халқи Ғалабага улкан ҳисса қўшганини, ўзбекистонликлар фронт ортида фидокорона меҳнат қилганини, эвакуация қилинганларни бағрикенглик билан қабул қилганини мамнуният билан қайд этди. Тошкент шаҳрида Ғалаба боғи ташкил этилгани алоҳида таъкидланди.

Президентлар кейинги йилларда икки томонлама алоқалар жадал ривожланиб бораётганини катта мамнуният билан қайд этган.

Жаҳон инқирози оқибатларининг салбий таъсирига қарамай, икки мамлакат ўртасидаги товар айирбошлаш ҳажми изчил ўсмоқда. Хусусан, 2019 йилда ушбу кўрсаткич 6,6 миллиард долларга етган. 2020 йилнинг илк ойларида ўзаро савдо ҳажми қарийб 2 миллиард долларни ташкил қилган.

Икки давлат етакчи компанияларининг кооперацияси кенгаймоқда: бугунги кунда 2 мингга яқин қўшма корхона фаолият юритмоқда, қиймати 12 миллиард доллардан зиёд бўлган янги инвестиция лойиҳалари амалга оширилмоқда.

Россиянинг Ўзбекистон иқтисодиётига киритган инвестициялари ҳажми 10 миллиард доллардан ошган.

Ҳамкорликнинг яна бир устувор йўналиши — фан ва таълим соҳаларидаги фаол алмашинувлар. Кейинги бир неча йилда Ўзбекистонда Россия етакчи олий таълим муассасаларининг 7 та филиали ташкил этилган. Уларнинг умумий сони 10 тага етган. Россиянинг яна 4 та университети филиалларини Ўзбекистонда очиш режалаштирилган.

Давлат раҳбарлари Ўзбекистон—Россия муносабатларининг долзарб масалаларини батафсил кўриб чиқди.

Владимир Путин ҳамда Шавкат Мирзиёев ўртасидаги мулоқот вақтида РФ президенти ўзига хос юмор билан ҳамкасбига ҳазил қилган.

«Россия ва Ўзбекистон ўртасидаги маданий алоқалар билан бир қаторда кулинария бўйича ҳамкорлик ҳам ривожланиб бормоқда. Фурсатдан фойдаланиб сизни тушликка таклиф қиламан», — дея ҳазил қилган Путин.

Фаол мулоқотни давом эттириш ҳамда ҳукумат раҳбарлари даражасидаги Қўшма комиссия ва Ҳукуматлараро комиссия фаолияти доирасида келишувларни ҳаётга татбиқ этиш муҳимлиги қайд этилди.

Икки мамлакат ҳукуматларига бўлажак олий даражадаги ташрифга пухта тайёргарликни давом эттириш, бунда янги иқтисодий дастурлар ва илғор инвестиция лойиҳаларига эътибор қаратиш топширилди.

Президентлар халқаро ва минтақавий масалалар юзасидан ҳам фикр алмашди, бўлажак учрашувлар режасини, шу жумладан, МДҲ ва ШҲТнинг навбатдаги саммитларига тайёргарлик кўриш ва уларни ўтказиш борасида англашиб олган.

Шавкат Мирзиёев 24 июнь куни фашизм устидан қозонилган ғалабанинг 75 йиллигига бағишланган тантанали тадбирларда иштирок этишни режалаштирган.