Бухоро шаҳридаги вилоят юқумли касалликлар шифохонасини реконструкция қилиш вақтида 577 миллион 903 минг 900 сўм миқдоридаги маблағ ноқонуний равишда талон-торож қилинди. Бу ҳақда Бош прокуратуранинг «Ҳуқуқ» нашри хабар бермоқда.
Таъкидланишича, Зиёдулла Мустафоев раҳбарлигидаги «Зиё санъат» МЧЖ Бухоро вилояти ҳокимлиги ҳузуридаги Ягона буюртмачи хизмати инжиниринг компанияси Бухоро шаҳридаги вилоят юқумли касалликлар шифохонасининг 270 ўринли биносини мукаммал реконструкция қилиш бўйича ўтказган тендерда ғолиб бўлган. Зиёдулла Мустафоев буюртмачи билан 2018 йил 5 июль куни шартнома расмийлаштиргач, буюртмачи томонидан реконструкция ишларини назорат қилиш учун тайинланган техник кузатувчи Амин Ҳамидов билан жиноий тил бириктирган.
Қайд этилишича, шартномага асосан шифохонада 4 миллиард 686 миллион сўмлик таъмирлаш ишларини бажариши лозим эди. Аммо жиноий шериклар келишувига асосан жамият томонидан 4 миллиард 108 миллион 96 минг сўмлик ишлар бажарилди. Натижада жами 577 миллион 903 минг 900 сўм талон-торож қилинди.
Суд ҳукмига кўра айбдор деб топилган Зиёдулла Мустафоев 2 йил муддатга ойлик иш ҳақининг 20 фоизини давлат ҳисобига ушлаб қолиш, Амин Ҳамидовга 3 йил муддатга ойлик маошининг 30 фоизини давлат ҳисобига ушлаб қолиш шарти билан ахлоқ тузатиш ишлари жазоси тайинланди.
2020 йил 23 июнь соат 17:00 ҳолатига кўра, Ўзбекистонда коронавирус инфекцияси қайд этилганлар сони 6 535 нафарни ташкил этмоқда. Беморларнинг 507 нафари Бухоро вилоятида аниқланган. Ҳозиргача вилоятда 472 нафар бемор соғайган.
Эслатиб ўтамиз, 2019 йил Самарқанд вилоятидаги юқумли касалликлар клиник шифохонасини реконструкция қилиш жараёнида белгиланган нархдаги кондиционерлар ўрнига арзон кондиционерлар ўрнатилган. Натижада давлатнинг миллионлаб маблағлари талон-торож қилингани аниқланган.
Изоҳ (0)