Сирдарё вилоятининг Гулистон шаҳрида 23 июнь, сешанба куни 2020 йилнинг май ойида туғилган чақалоқни сотмоқчи бўлган аёллар қўлга олинди. Бу ҳақда Ички ишлар вазирлиги матбуот хизмати хабар берди.
Маълум қилинишича, Сирдарё вилояти ИИБ томонидан ўтказилган тезкор тадбир давомида Сардоба туманида яшовчи Л. ва М. исмли аёллар Л.нинг фарзандини 18 минг доллар эвазига сотган вақтида қўлга олинган.
Тадбир давомида Л. ҳамда М. исмли аёллардан ашёвий далил тариқасида 18 минг доллар олинган. Мазкур ҳолат юзасидан ҳозирги вақтда Сирдарё вилояти ИИБ ходимлари томонидан тезкор текширув ишлари олиб борилмоқда.
Мазкур аёллар Сардоба фалокатидан жабрланган ёки йўқлиги номаълум.
Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Фавқулодда вазият сабабли Сардоба, Оқолтин, Мирзаобод туманларидаги 24 та маҳалладан 90 мингга яқин фуқаро зудлик билан хавфсиз ҳудудга эвакуация қилинган. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.
15 май куни Президент Шавкат Мирзиёев сардобаликлар билан учрашувда сув тошқини оқибатида зарар кўрган уйлар давлат томонидан бепул таъмирлаб берилишини, уйлари зарарланган одамларнинг илгариги ҳовлилари ҳам ўзларида қолишини маълум қилган эди. Бундан ташқари, шу куни сув тошқинидан жабр кўрган 4,5 мингдан ортиқ хонадон эгаларига 40 миллион сўмлик моддий ёрдам сертификати, маиший техника тўплами учун сертификат ва ичида пул маблағи бўлган банк карточкалари тарқатилиши маълум қилинди.
Бош прокуратура Сардоба фалокати юзасидан жиноят иши бўйича 4 та тергов версиясини кўриб чиқмоқда. Ҳозирда сув омбори иши бўйича икки киши қамоққа олинган.
Изоҳ (0)