Ўзбекистон Транспорт вазирлиги ахборот хизмати раҳбари Наврўз Ашурматов 23 июнь, сешанба куни ўтказилган брифингда халқаро темир йўл ва автомобиль қатновлари қачон тикланишига аниқлик киритди.
Брифингда Қозоғистонга чиқиш учун темир йўл чегаралари қачон очилиши, талабалар ҳозирги пайтда поезд ёки автомобиль орқали чегарадан ўтишлари мумкин ёки йўқлиги масаласида савол берилди.
Маълум қилинишича, поезд ва автомобиль транспорти орқали халқаро қатновлар ҳозирча тиклангани йўқ. Мазкур масалада Республика махсус комиссияси қарор қабул қилади.
Ўзбекистонда илк бор коронавирус аниқланган 16 мартдан бошлаб автотранспорт воситасида мамлакатга кириш-чиқиш тўхтатилган. Темир йўл транспорти ҳам ташқи дунёдан узилган.
Мамлакатда 18 майдан маҳаллий темир йўл қатновлари қисман қайта тикланди. 15 июндан бошлаб эса «сариқ» ва «яшил» тоифаларга ажратилган ҳудудлар ўртасида санитария-гигиена қоидаларига қатъий риоя этган ҳолда 7 та йўналишда поездлар қатновини қайта тиклашга рухсат берилди. Мамлакатда шахсий автотранспорт воситаларининг вилоятлараро ҳаракатланишига қўйилган чекловлар ҳамон ўз кучида қолмоқда.
Изоҳ (0)