Bir necha oy davom etgan inqiroz va qulashlardan keyin turizm sohasi dunyoning ayrim davlatlarida qayta tiklana boshladi. Bu haqda BMTning Jahon turizm tashkiloti (UNWTO) ma’lumot bergan, deb xabar qildi “Interfaks” .
“Turizm dunyoning ko‘plab mamlakatlarida, xususan, yerning shimoliy yarim sharida asta-sekin qayta tiklanmoqda. Ayrim davlatlardagi xalqaro sayohatlarga qo‘yilgan taqiq ham saqlanib turibdi, turizm esa pandemiya tufayli eng ko‘p zarar ko‘rgan sohalardan biri bo‘lib qolmoqda”, – deyiladi xabarda.
UNWTO mamlakatlarning hukumatlariga murojaat qilib ulardan millionlab xodimlar band bo‘lgan, ayrim davlatlarda iqtisodiyotning asosi bo‘lgan sohani qo‘llab-quvvatlashni so‘ragan.
“Turizmning qayta tiklanishi davlatlar uchun asosiy yo‘nalishlardan biriga aylanishi va soha xavfsizligi ta’minlanishi lozim. Ular turizmni iqtisodiy jihatdan qo‘llab-quvvatlash va uning tiklanishi uchun Yevroittifoq, Fransiya va Ispaniyadagi kabi sharoit yaratishi zarur”, – degan UNWTO bosh direktori Zurab Pololikashvili.
Mavzuga doir: Butunjahon turizm va sayohatlar kengashi turizm uchun eng xavfsiz bo‘lgan mamlakatlarni e’lon qildi
“Bunda ayniqsa Osiyo – Tinch okeani mintaqasi katta zarar ko‘rgan, hududga qilinadigan sayohatlar yanvar – aprel oylarida 51 foizga qisqargan. Yevropa bu borada ikkinchi (44 foizga), keyingi o‘rinlarda Yaqin Sharq (40 foizga), Amerika qit’asi davlatlari (36 foizga) va Afrika (35 foizga) qayd etilgan”, – deyiladi UNWTO xabarida.
May oyi boshida tashkilot 2020-yilning qolgan qismida turizm sohasini kutayotgan uchta ssenariyni e’lon qilgan. Ularda davlat joriy etgan cheklov choralari tufayli turistlar oqimining 58 – 78 foizga pasayishi taxmin qilingan.
“COVID-19 pandemiyasi sabab xalqaro turistik sayohatlar 850 milliondan 1,1 milliardgacha, soha moliyaviy zarari esa 910 milliarddan 1,2 trillion dollargacha kamayadi. Turizmda 100 – 120 million ish o‘rni xavf ostida qolgan”, – deyilgan bayonotda.
Izoh (0)