Харид қилиш тавсия қилинмайдиган косметик воситалар

Қуйидаги косметик воситаларни харид қилиш, пулни кўкка совуришдан бошқа нарса эмас.

Тень палитраси

Ичида 120 хил рангни ўзига жамлаган палитрани олиб, ундан кўпи билан 20 тасини ишлатасиз. Ҳатто, профессионал макияж билан шуғулланадиганлар ҳам бунча кўп рангдан фойдаланмаслиги аниқ. Ранглар кўплигига учмасдан ростан ҳам кундалик суртса бўладиган ва қўшимча сифатида бир-икки махсус тадбирларга мўлжалланган ранглари бор тень харид қилинг.

Макияж учун чўткалар тўплами

Харид давомида сон эмас, сифатни танлашни ўрганинг. 30 талик чўткани олиб, ишлатилмайдиган буюмларингиз сонини кўпайтиргандан кўра 10-12 та керакли, асосийси сифатли тўпламни сотиб олинг.

Соч гуллашига қарши восита

Соч толаси гуллашининг бирдан бир ечими — кестириш ҳисобланади. Шунинг учун бекорга ҳар хил воситаларга маблағ сарфлашни бас қилинг. Ундан кўра сочингизга табиий озиқлантиринг, парвариш қилинг, гуллашни олдини олиш учун маълум муддатда сартарошга бориб туринг.

Целюллитга қарши крем

Целюллитни турли воситалар билан йўқ қилишга уринманг, фойдаси йўқ. Лекин бу ечим йўқ дегани эмас, яхшиси таомномангизга эътибор беринг, спорт билан шуғулланинг, массаж муолажасини олинг. Крем суртиб, кун бўйи ҳаракатсизлик билан фақат ўзингизни алдаганингиз қолади.

Универсал шампунь ва крем

Инсон ташқи кўриниши бир-бирига ўхшамагани сингари, организм, тери тузилиши ва соч ҳам ҳар хил бўлади. Бу дегани универсал ҳар қандай воситадан фойдаланавермаслик керак. Терингиз қуруқ бўлса, универсал крем ёки шампунь терининг қуриши, сочингизда қазғоқ кўпайишига олиб келиши мумкин. Шунинг учун ўзингиздан келиб чиқиб, индивидуал восита танланг.

Тери ва лаб скраби

Ўз қўлингиз билан тайёрлашингиз мумкин бўлган нарсага пул кетказгандан нима наф? Кофе, асал, туз ва зайтун ёғидан тайёрланган скраб табиий ва ишончлилиги билан сиз харид қиладиган қимматбаҳо воситалардан яхшироқ натижа кўрсатади.

Қазғоққа қарши шампунь

Қазғоқдан халос бўлиш учун билар-билмас воситалардан фойдалангандан кўра, бир марта шифокор кўригида бўлиш ва тавсияларига асосан даволаниш керак. Шампунь ёки бальзамлар маълум муддат қазғоқларни йўқ қилгани билан кейин яна такрор кузатилиши мумкин.

Тоник

Косметологлар юз терисининг соғлом ва тиниқ бўлиши учун тоникдан фойдаланишни тавсия қилади, лекин таркибида гамамелис ва спирт бўлган воситаларни харид қилмаслик керак. Ўрнига гиалурон кислота ёки алой бўлган тониклари харид қилинг.

Пастки киприк учун мўлжалланган туш

Тепа киприк учун алоҳида, пастки киприк учун алоҳида туш харид қилиш, пулини қаерга қўйишни билмаётганларга хос. Ахир туш таркиби ҳам, киприклар тузилиши ҳам бир хил бўлади. Шунчаки пастки киприкларга суртилганда суркалиб кетмаслиги учун чўткаси ингичкароғини танлаш керак, холос.