Қимматбаҳо кийим кийилгани, ўткир ифорли атир сепилгани билан қуйидаги элементар гигиена қоидаларига риоя қилинмаслик аёл киши ҳақида салбий таассурот қолишига сабабчи бўлади
1. Ёғланган сочлар
Сочларнинг аҳволи қандай экани аёл киши кўринишида муҳим рол ўйнайди. Тўсатдан учрашув ёки тадбирга бориш керак бўлиб қолса-ю, ҳеч қанақасига вақт бўлмаса, кирланган сочнинг турмакланганини тушуниш мумкин, лекин бу аҳвол қайта-қайта такрорланишини ҳеч қандай баҳона билан оқлаб бўлмайди. Ювилмаган, кир сочлар биринчидан кишининг ўзини ишончсиз ҳис қилиши, иккинчида эса атрофдагиларда ёқимсиз хотира қолишига сабаб бўлади.
2. Тартибсиз тирноқлар
Тирноқлар чиройли кўриниши учун, албатта, лак суриш ёки салонга бориш шарт эмас. Тартибланган, соғлом тирноқлар оддий кўринишга эга бўлган инсоннинг ҳам деталларга қанчалик эътиборли эканидан дарак беради.
3. Ётишдан аввал тозаланмаган макияж
Юз ҳам нафас олиши керак. Эринчоқлик оқибатида макияжни ювмаслик, терининг носоғлом ва чарчагандек кўринишига олиб келади. Тўйга бориб, эртаси кунигача юзни ювмаслик ва макияж билан ўқиш ё ишга бориш ҳақида-ку, гапирмаса ҳам бўлаверади.
4. Ёмон ҳид устидан сепилган атир
Кўриниши мукаммал бўлган аёлдан ёмон ҳид анқишидан хунук нарса бўлмаса керак. Айниқса, унинг устидан атир сепилса борми? Энг амал қилиниши керак бўлган, оналар фарзандларининг қулоғига қуйиши керак бўлган жиҳатлардан бири шу — ҳар куни ювиниб, тараниб кейин атир ва хушбўй ҳидли воситалардан фойдаланиш керак.
5. Оғиздан келадиган бадбўй ҳид
Овқатлангандан кейин оғизни чайиш, тишларни ювиш кераклиги айтилмаса ҳам амал қилиниши керак бўлган одатлардан. Лекин кўпчилик буни ёддан чиқариб қўйиши оқибатида суҳбатдошда яхши таассурот қолмайди.
Изоҳ (0)