Гўзаллик учун машҳурлар қандай муолажаларга рози бўлмайди дейсиз? Шишириш, яшириш, таранглаштириш вақтинча чиройли кўрингани билан йиллар ўтиб саломатликка зарар етказиши исботланган. Шуни тушуниб етган қуйидаги юлдузлар эса ташқи кўринишида табиийликка урғу беришни афзал кўрган.
Кейт Миддлтон
Қироллик оиласига қадам қўйишдан аввал Кейт ташқи кўриниши устида кўп ишлаган. Меъёрга амал қилган ҳолда юзига гўзаллаштирувчи укол муолажаларини олган. Шунга қарамасдан, айни вақтда малика гўзаллик инъекцияларидан буткул воз кечган. Бу эса малика табиий гўзалликни сохталикдан кўра афзал кўрганидан далолат беради.
Унинг аввалги ва ҳозирги суратлари солиштирилса, пешонасида ёшига монанд майда ажинлар пайдо бўла бошлаганини, бироқ шу билан ҳам истарали ва латофатли эканини пайқаш мумкин.
Кортни Кокс
«Дўстлар» сериали юлдузи бўлган Кортни авваллари гўзаллик уколларини канда қилмагани сабаб кўплаб танқидларга нишон бўлган. Унинг қиёфасида ажинлар кўринмас, мимикаси эса қотиб қолгандек туйиларди.
Эндиликда эса унинг суратларига диққат билан эътибор берилса, у укол муолажаларини бас қилганини кўриш мумкин. Бу эса актриса ўзини борича қабул қилганидан дарак беради.
Гвинет Пэлтроу
48 ёшли актриса уколларни меъёридан ошириб юбормасликка ҳаракат қилган. У укол орқали терисини таранг қилиб кўрсатиш, пешонадаги ажинларни яшириш муолажаларидан фойдаланганига қарамай, бугунга келиб буларнинг баридан буткул воз кечишга қарор қилган.
Актрисанинг таъкидлашича, табиий қиёфа унга ички гўзаллигини ҳис қилишга ёрдам бермоқда. Эндиликда у макияжсиз, ажин ва бошқа табиий камчиликлар кўзга ташланадиган суратлари билан бўлишишдан уялмайди ва ҳаётидан мамнун кўринади.
Изоҳ (0)