Toshkent shahar YHXBB nosoz Nexia haydovchisi voqeani boshqacha talqin qilishga uringanini ma’lum qildi (video)

Toshkent shahar IIBB YHXBB “Aviasozlar” dehqon bozori yonida “To‘xtash taqiqlanadi” belgisi ta’sir doirasida to‘xtab turgan Nexia haydovchisining buzilib qolgan mashinaga ham jarima yozib ketishgani haqidagi videosi yuzasidan rasmiy izoh berdi.

Videoda haydovchi mashinasi buzilib qolgani, ammo YPX inspektori uni eshitishni ham istamay qoidabuzarlikni planshetga tasvirga olib, jarima rasmiylashtirganini aytib o‘tgan.

Yo‘l harakati xavfsizligi bosh boshqarmasining izohida esa voqea boshqacha talqin qilingani bildirilgan. Boshqarma vakili 2020-yil 19-iyun kuni bozor yonida avariya mayoqchalarini yoqib turgan Nexia aslida nosoz bo‘lmagani, xodim hamda haydovchining suhbati bodikameraga yozib olinganini ta’kidlagan.

Boshqarma taqdim etgan videoda haydovchi va uning sherigi bozorga ikki daqiqaga kirib chiqish uchun to‘xtagani, tezda yurib ketishi, 2 million so‘mlik boshqa jarimasi borligini aytgan.

O‘zbekistonda yo‘l harakati qoidalarining buzilishiga doir ma’muriy jarimalarni to‘lashning billing tizimi ishga tushirilgan: YXH inspektorlari haydovchilarning yo‘l harakati qoidalarini buzgani faktini voqea joyida planshetlarda tasvirga olib, “Ma’muriy amaliyot” kompleks avtomatlashtirilgan axborot tizimiga kiritmoqda. Tizim asosida esa qoidabuzarlarning telefoniga SMS xabarnoma shaklida va pochta orqali jarima yuborilmoqda.

Bundan tashqari, to‘xtash taqiqlangan joylarda qoldirilgan mashinalar harakatdagi avtopatrullar tomonidan qayd etilib, ayrim hollarda bir vaqtning o‘zida o‘nlab qoidabuzarlarga avtomatik tartibda jarimalar yuborilmoqda.

To‘xtash yoki to‘xtab turish qoidalarini buzganlik uchun bazaviy hisoblash miqdorining 3 baravari (669 ming so‘m)dan 15 baravari (3 million 345 ming so‘m)gacha jarima belgilangan.