АҚШ ҳукумати Дональд Трампнинг миллий хавфсизлик масалалари бўйича собиқ маслаҳатчиси Жон Болтоннинг давлат сирларини ошкор этган китоб сотувидан даромад олишига тўсқинлик қилмоқчи. Бу ҳақда Оқ уй матбуот котиби Кейли Макинени маълум қилган.
«Ҳукумат Болтоннинг кейинчалик ҳам ўзи имзо қўйган келишув (давлат сирларини ошкор этмаслик ҳақида) шартларига риоя қилишига эришмоқчи ва уни пул ишлаб олиш мақсадида миллий хавфсизликни ҳимоялаш тўғрисидаги мажбуриятларини бажармасдан мазкур шармандали қарорни қабул қилгани учун китобдан тушадиган даромаддан маҳрум қилмоқчи», — деган Макинени.
Оқ уй расмийси суднинг китобнинг нашр қилишига рухсат берганини асар нусхалари чоп этилгани ва тарқалиб бўлгани, шу сабабли ҳам бу борада тақиқлаш чораларини қўллаш кечиккан тадбирга айланиши билан изоҳлаган.
Кейли Макинени суднинг Болтон мемуарлари ҳақидаги қарорни қабул қилиш вақтида президент собиқ маслаҳатчисининг мамлакат миллий хавфсизлигини хавф остига қўйганини алоҳида қайд этгани ҳақида ҳам гапирган.
Дональд Трамп суднинг мазкур қарорига муносабат билдириб, Болтонни қонунни бузганликда айблаган ва бунинг учун уни оғир жазо кутишини қайд этган.
«Ҳаммаси тушунарли ва оддий: мен имконият берган ва ҳурмат қилган Жон Болтон махфий ахборотни ошкор этиб қонунни бузган», — дея ёзган Трамп Twitter’даги саҳифасида.
АҚШ давлат котиби Майкл Помпео ҳам Жон Болтоннинг махфий маълумотларни ўз ичига олган мемуарларни нашр этиш тўғрисидаги қарорини қоралаган.
Болтоннинг «Бу юз берган хона: Оқ уй мемуарлари» китобининг тақдимоти 23 июнда бўлиб ўтиши режалаштирилган, китобнинг нусхалари АҚШдаги турли шаҳарлардаги дўконларга тарқатиб бўлинган.
Собиқ маслаҳатчининг иши март ойида сотувга чиқарилиши лозим эди, бироқ кейин тақдимот майга, сўнгра 23 июнь санасига қолдирилган. 2020 йил январида ОАВда Болтон китобидан парчалар чиқа бошлагач, Оқ уй миллий хавфсизлик кенгаши уларда давлат сирига тааллуқли гапларнинг борлиги ҳақида баёнот берганди.
Мавзуга доир: Трампнинг собиқ маслаҳатчиси президент Буюк Британияда ядро қуроли борлиги ҳақида билмаганини маълум қилди
Изоҳ (0)