Бутун дунёда коронавирус инфекциясига қарши 300 га яқин вакцина клиник синовлардан ўтказилмоқда. Жаҳон соғлиқни сақлаш ташкилоти учта вакцинанинг якуний босқич синовларида қатнашишига рухсат беришни режалаштиряпти. Бу ҳақда ЖССТнинг илмий ходими Сумия Сваминатанга таяниб, БМТнинг янгиликлар хизмати хабар берди.
Якуний босқичдан сўнг экспертлар вакцина қанчалик самарали ва хавфсиз эканлигини аниқ айта олади. Сваминатаннинг огоҳлантиришича, бу жуда мураккаб жараён ва ҳозирча муваффақиятга эришилишига тўлиқ ишониб бўлмайди.
«Ижобий жиҳати шундаки, бизда бир нечта номзод-вакциналар мавжуд. Бирортаси барча синовлардан муваффақиятли ўтса, йил охирига бориб бозорда бир ёки бир неча вакцинанинг юз миллионлаб дозаси пайдо бўлади. Яна миллиардлаб доза 2021 йилга бориб тайёр бўлади», — дейди илмий ходим.
ЖССТ ҳозирда келажакдаги эмлаш учун устувор гуруҳларни шакллантирмоқда, ундан дастлаб ҳайдовчилар ва тез ёрдам ходимлари, тиббиёт, полиция, озиқ-овқат дўконлари ва санитария хизматлари ходимлари ўрин олади.
Экспертларнинг ҳисоблашича, дастлабки босқичида кексалар, шунингдек, қон босими, қандли диабет ва деменция каби касалликлардан азият чекувчилар эмланиши керак.
Эслатиб ўтамиз, май ойининг бошларида Япония ҳукумати коронавирусга чалинган беморларни даволашда Американинг вирусга қарши тажрибавий «Ремдесивир» препаратидан фойдаланишни маъқуллаган эди. Касаллик ўчоғи бўлган Хитой эса вакцина яратилса, уни бутун дунёга тарқатишга ваъда берган.
Изоҳ (0)