Россия президенти Владимир Путин Совет республикаларининг СССР таркибидан чиқиши борасидаги фикрлари билан бўлишди. Президентнинг фикри «Россия 1» телеканали орқали эфирга кетган Павел Зарубиннинг «Россия. Кремль. Путин» фильмида намойиш этилган.
Путиннинг таъкидлашича, Совет Иттифоқини ташкил этишда республикаларнинг ундан чиқиш ҳуқуқи белгилаб қўйилган, бироқ жараён ҳақида ҳеч нарса дейилмаган.
«Совет Иттифоқини ташкил этиш битимида ундан чиқиш ҳуқуқи ҳақида ёзилган, бироқ жараён ҳақида ҳеч нарса дейилмагани сабаб савол юзага келади: бирор-бир республика Совет Иттифоқи таркибига кирса, бироқ Россиянинг улкан ерларига, Россиянинг тарихий ҳудудларига эга бўлиб, тўсатдан иттифоқ таркибидан чиқишга қарор қилса, ҳеч бўлмаганда қандай кирган бўлса, шундай чиқсин. Ўзи билан рус халқининг совғаларини олиб кетмасин. Ахир буларнинг ҳеч бири ёзилмаган. Мутлақо ишончим комилки, Конституцияга ўзгартириш киритиб тўғри қиляпмиз», — дейди Россия президенти.
Ўзбекистонлик блогерлар Россия президентининг бу сўзларини хавотир билан қарши олди, жумладан, davletovuz шундай деб ёзади:
«Тағин Путин Собиқ Иттифоқ мамлакатларида Россияга қарши кайфият шаклланмоқда, деб бонг уради. Бу кайфиятга асосий сабабчи унинг ўзи, сўзи ва амали аслида.
Унинг навбатдаги абсурд интервьюларидан бирига кўра, Собиқ Иттифоқ республикалари мустақил бўлаётганда Россияга тегишли бўлган ерларни, тарихан Россия ҳудуди бўлган ерларни олиб иттифоқ таркибидан чиқиб кетишган. СССРга қўшилган пайтдаги ери билан кетсин эди, дейди у. Рус халқидан совғаларни ўзи билан олиб кетмасин эди, дея надомат чекяпти. Кундан кунга қўрқинчли».
Аввалроқ Путиннинг Иккинчи жаҳон уруши ҳақидаги мақоласи эълон қилингани, у Болтиқбўйи давлатларининг СССРга қўшилиши қонуний бўлгани ҳақида ёзгани тўғрисида хабар берилганди.
Изоҳ (0)