Хитойнинг Чунцин шаҳридаги дарёга тушиб кетган дўстини қутқармоқчи бўлган етти нафар мактаб ўқувчиси сувга чўкиб кетди. Бу ҳақда Хитой Марказий телевидениесига таяниб, «РИА Новости» хабар берди.
Кўнгилсиз ҳодиса 21 июнь куни Туннань уездидаги Мисьнь аҳоли пунктида содир бўлган. Маълум қилинишича, кимдир Фуцзян дарёси тўғони яқинидаги сувга тушиб кетгани тўғрисида маҳаллий ҳукуматга хабар бергач, қидирув-қутқарув операцияси бошланган. Саккиз нафар боланинг барчаси бедарак йўқолган дея эълон қилинган, қутқарув ишларига 200 дан ортиқ инсон, жумладан, ўт ўчирувчилар, қутқарувчилар, ҳуқуқ-тартибот идоралари ходимлари жалб этилган.
Аммо кўрилган тезкор чораларга қарамай, болаларни қутқаришнинг иложи бўлмаган. Маҳаллий вақт билан соат 00:30 да қутқарувчилар сув остидан етти нафар ўқувчининг жасадини чиқариб олган, соат 07:10 да эса саккизинчи бола топилган.
Дастлабки маълумотларга кўра, 10-12 ёшли болаларнинг барчаси маҳаллий мактаб ўқувчилари бўлган ва шу яқин атрофда яшаган. Дам олиш куни тўғон атрофида ўйнагани келишган, бироқ болалардан бири эҳтиётсизлик сабаб сувга тушиб кетган. Қолган етти нафар ўқувчи эса уни қутқариш мақсадида сувга тушган, бироқ ҳеч бири қайтиб чиқа олмаган.
Изоҳ (0)