Хитойда сўнгги суткада коронавирус билан касалланиш бўйича 18 та ва касаллик белгисиз ўтаётган 7 та ҳолат аниқланди. Бирорта ҳам бемор соғаймаган ҳамда вафот этиш ҳолатлари қайд этилмаган. Бу ҳақда Хитой Соғлиқни сақлаш миллий комиссиясига таяниб, «РИА Новости» хабар берди.
Маълумотларга кўра, аниқланган ҳолатларнинг 11 таси мамлакатнинг ўзида, 7 таси четдан юқтирилган.
Бир кун аввал коронавирус билан касалланиш бўйича 26 та ва касаллик белгисиз ўтаётган 6 та ҳолат аниқланганди. Уларнинг аксарияти Пекиннинг Фэнтай ҳудудидаги «Синьфади» энг йирик улгуржи бозори билан боғлиқ бўлиб, айни пайтда бозор ёпилган.
Мамлакатда умумий ҳисобда 83 396 киши коронавирусга чалинган. Беморларнинг 78 413 нафари соғайган, 4634 нафари вафот этган.
Жанубий Кореяда ўтган бир сутка ичида яна 17 кишида коронавирус аниқланди. Бутун мамлакат бўйлаб коронавирусга чалинганлар сони 12 438 кишига, соғайганлар эса 10 881 кишига етди. COVID-19 қурбонлари сони эса 280 кишини ташкил этмоқда.Жанубий Кореяда май ойининг бошидан буён коронавирус билан касалланиш ҳолатларида даврий равишда сакраш кузатилаётганди. Уч ҳафтадан ортиқроқ вақтдан бери янги касалланиш ҳолатлари кунига 30-60 кишини ташкил этаётганди.
Соғлиқни сақлаш вазирлиги ҳузуридаги Касалликлар назорати ва профилактикаси марказининг (KCDC) таъкидлашича, касалланганларнинг 11 нафари вирусни мамлакатнинг ўзида, 6 нафари четдан юқтирган.
Мамлакатда ўтган бир сутка ичида 13 кишига касалхоналардан жавоб берилган. Жанубий Кореяда ҳозирга қадар коронавирусга 1,18 миллион киши текширилган.
Изоҳ (0)