AQShda maxfiy ma’lumotlarni oshkor qilib kitob yozgan Trampning sobiq maslahatchisi uning sotuvidan foyda olmaydigan bo‘ldi

AQSh hukumati Donald Trampning milliy xavfsizlik masalalari bo‘yicha sobiq maslahatchisi Jon Boltonning davlat sirlarini oshkor etgan kitob sotuvidan daromad olishiga to‘sqinlik qilmoqchi. Bu haqda Oq uy matbuot kotibi Keyli Makineni ma’lum qilgan.

“Hukumat Boltonning keyinchalik ham o‘zi imzo qo‘ygan kelishuv (davlat sirlarini oshkor etmaslik haqida) shartlariga rioya qilishiga erishmoqchi va uni pul ishlab olish maqsadida milliy xavfsizlikni himoyalash to‘g‘risidagi majburiyatlarini bajarmasdan mazkur sharmandali qarorni qabul qilgani uchun kitobdan tushadigan daromaddan mahrum qilmoqchi”, — degan Makineni.

Oq uy rasmiysi sudning kitobning nashr qilishiga ruxsat berganini asar nusxalari chop etilgani va tarqalib bo‘lgani, shu sababli ham bu borada taqiqlash choralarini qo‘llash kechikkan tadbirga aylanishi bilan izohlagan.

Keyli Makineni sudning Bolton memuarlari haqidagi qarorni qabul qilish vaqtida prezident sobiq maslahatchisining mamlakat milliy xavfsizligini xavf ostiga qo‘yganini alohida qayd etgani haqida ham gapirgan.

Donald Tramp sudning mazkur qaroriga munosabat bildirib, Boltonni qonunni buzganlikda ayblagan va buning uchun uni og‘ir jazo kutishini qayd etgan.

“Hammasi tushunarli va oddiy: men imkoniyat bergan va hurmat qilgan Jon Bolton maxfiy axborotni oshkor etib qonunni buzgan”, — deya yozgan Tramp Twitter’dagi sahifasida.

AQSh davlat kotibi Maykl Pompeo ham Jon Boltonning maxfiy ma’lumotlarni o‘z ichiga olgan memuarlarni nashr etish to‘g‘risidagi qarorini qoralagan.

Boltonning “Bu yuz bergan xona: Oq uy memuarlari” kitobining taqdimoti 23-iyunda bo‘lib o‘tishi rejalashtirilgan, kitobning nusxalari AQShdagi turli shaharlardagi do‘konlarga tarqatib bo‘lingan.

Sobiq maslahatchining ishi mart oyida sotuvga chiqarilishi lozim edi, biroq keyin taqdimot mayga, so‘ngra 23-iyun sanasiga qoldirilgan. 2020-yil yanvarida OAVda Bolton kitobidan parchalar chiqa boshlagach, Oq uy milliy xavfsizlik kengashi ularda davlat siriga taalluqli gaplarning borligi haqida bayonot bergandi.