Қозоғистоннинг Олмаота вилояти ҳокими Омондиқ Баталовда коронавирус аниқланди. Бу ҳақда вилоят администрацияси матбуот хизматига таяниб, «РИА Новости» хабар берди.
Таъкидланишича, ҳокимнинг коронавирусга топширган тести ижобий чиққач, у ўзини изоляциялаган.
«Олмаота вилояти ҳокими Омондиқ Баталов изоляцияга кетди. Афсуски, полимераза занжир реакцияси ёрдамида ўтказилган тест натижаси COVID-19 борлигини кўрсатди. Ҳокимда коронавирус касаллиги белгиларсиз кечмоқда», — дейилади хабарда.
Маълумотларга кўра, Баталов ўзини изоляциялаган ҳолда даволаниш муолажаларини олади ва масофадан туриб ишлашни давом эттиради.
Аввалроқ Қозоғистоннинг биринчи президенти Нурсултон Назарбоев ҳамда мамлакат соғлиқни сақлаш вазири Елжан Биртановда ҳам коронавирус аниқлангани ҳақида хабар берилганди.
Сўнгги маълумотларга кўра, Қозоғистонда коронавирус билан касалланганлар сони 17 732 кишига етди. Ҳозирга қадар мамлакатда 10 897 киши вирусдан даволанишга муваффақ бўлган, 120 киши COVID-19 қурбонига айланган.
Изоҳ (0)