Коронавирус хавфи сабаб «қизил» ҳудудга айланган Шофиркон туманидаги тиббиёт муассасалари юқори аниқликда ташхис қўювчи ва замонавий даволаш ускуналари билан таъминланмагани маълум бўлди. Шунга кўра, туман марказида беш қаватли замонавий тиббиёт бирлашмаси қурилиши бошлаб юборилди. Бу ҳақда «Дарё»га туман ҳокимлиги ахборот хизмати хабар берди.
Таъкидланишича, туман марказидаги «Қалмақон» маҳалласида янгича андозадаги 260 ўринга мўлжалланган кўп тармоқли тиббиёт бирлашмаси қурилиши бошланган. Мазкур шифо маскани Бухоро вилоят ҳокимлиги ҳузуридаги «Ягона буюртмачи хизмати» инжиниринг компанияси буюртмасига асосан бунёд этилмоқда.
«Умумий қиймати 40 миллиард 98 миллион сўм бўлган мазкур лойиҳа 2021 йилнинг декабрь ойига қадар якунланиши кўзда тутилган. Хайрли ишда сусткашликка йўл қўймай, объект ўз вақтида сифатли қуриб битказилишига эришамиз», — деди Шофиркон тумани ҳокими Шукрулла Ҳакимов.
Эслатиб ўтамиз, бир оиланинг 7 нафар аъзосида коронавирус аниқланганидан сўнг Шофиркон тумани «қизил» ҳудудга айланганди ва туманга кириб-чиқиш тўхтатилган эди.
Изоҳ (0)