Koronavirus xavfi sabab “qizil” hududga aylangan Shofirkon tumanidagi tibbiyot muassasalari yuqori aniqlikda tashxis qo‘yuvchi va zamonaviy davolash uskunalari bilan ta’minlanmagani ma’lum bo‘ldi. Shunga ko‘ra, tuman markazida besh qavatli zamonaviy tibbiyot birlashmasi qurilishi boshlab yuborildi. Bu haqda “Daryo”ga tuman hokimligi axborot xizmati xabar berdi.
Ta’kidlanishicha, tuman markazidagi “Qalmaqon” mahallasida yangicha andozadagi 260 o‘ringa mo‘ljallangan ko‘p tarmoqli tibbiyot birlashmasi qurilishi boshlangan. Mazkur shifo maskani Buxoro viloyat hokimligi huzuridagi “Yagona buyurtmachi xizmati” injiniring kompaniyasi buyurtmasiga asosan bunyod etilmoqda.
“Umumiy qiymati 40 milliard 98 million so‘m bo‘lgan mazkur loyiha 2021-yilning dekabr oyiga qadar yakunlanishi ko‘zda tutilgan. Xayrli ishda sustkashlikka yo‘l qo‘ymay, obyekt o‘z vaqtida sifatli qurib bitkazilishiga erishamiz”, — dedi Shofirkon tumani hokimi Shukrulla Hakimov.
Eslatib o‘tamiz, bir oilaning 7 nafar a’zosida koronavirus aniqlanganidan so‘ng Shofirkon tumani “qizil” hududga aylangandi va tumanga kirib-chiqish to‘xtatilgan edi.
Izoh (0)