Фарғона вилояти Сўх туманида телекоммуникация инфратузилмасини кенгайтириш ва хизматлар сифатини яхшилаш мақсадида 71 километр оптик толали алоқа кабеллар, умумий сиғими 560 портли замонавий қурилмалар, темир-бетон устунлар, 5 та мобил алоқа база станциялари етказилди. Бу ҳақда Ахборот технологиялари ва коммуникацияларини ривожлантириш вазирлиги ахборот хизмати хабар берди.
Ҳозирда модернизация ишлари бошланган кундан буён жами 101 та темир-бетон устунлар ўрнатилди, 33 та туман захирасида мавжуд алоқа устунлари кўчириб ўтказилган. Сўх туманидаги ижтимоий аҳамиятга эга 52 та объектларга, 23 та умумтаълим мактаби, 20 та мактабгача таълим муассасаси ҳамда 9 та тиббиёт муассасасига жами 71 километр оптик толали алоқа линиялари тортилган.
Таъкидланишича, туманда кўрсатилаётган хизматлар ҳажмини ошириш ва сифатини янада яхшилаш мақсадида жами 500 метр ерости оптик толали алоқа линияси қурилган. Мазкур қурилаётган оптик толали магистрал алоқа линиясида 2 Гб/с алоқа каналларини ташкил этиш учун қурилмалар ўрнатилган.
Маълум қилинишича, туманга етказилган 5 та мобил алоқа таянч станцияларининг барчаси «Ленбург» ва «Чашма» МФЙ ҳудудларида ҳамда Сўх туман марказида ўрнатилиб ишга туширилган. Бундан ташқари, «Чўнғара» МФЙ ҳудудида «Ўзбектелеком» АК Uzmobile филиалининг юқори тезликдаги интернет технологияси асосидаги таянч станциясини ўрнатиш учун қурилиш-монтаж ишларига тайёргарлик кўрилмоқда.
Uzmobile филиалининг тумандаги барча таянч станциялари юқори тезликдаги 4G стандартига хос интернет технологияси асосида модернизация қилинган.
«Шунингдек, Ленбург—Чодак йўналишида магистрал транспорт тармоғини кенгайтириш мақсадида қўшимча радиореле қурилмаси ўрнатилди. Туман марказий шифохонаси Фарғона шаҳридаги Соғлиқни сақлаш бошқармаси ўртасида тегишли ахборот тизимлари ва дастурий таъминотларни жорий этган ҳолда масофавий ташхис ишларини амалга ошириш учун телемедицина тизими жорий этилди. Туман Солиқ инспекцияси биносига қадар оптик толали алоқа линиялар тортилган бўлиб, ҳозирда юқори тезликдаги интернет хизматини тақдим этиш мақсадида кенг полосали қурилма ўрнатилди», — дейилади хабарда.
Белгиланган ишларни амалга ошириш учун бугунги кунда 45 нафар мутахассис ва ишчи ходимлар, шундан 20 нафар ходим Сўх тумани аҳолисидан шартнома асосида жалб қилинган.
Аввалроқ Сўхга электр таъминотини яхшилаш учун турли қувватдаги 16 дона трансформатор пункти, 79 километр узунликдаги замонавий электр узатиш кабеллари, 80 дона темир-бетон таянч, 1200 дан ортиқ изолятор, 10 турдаги электр қурилмалари юборилгани, Фарғона вилояти ҳокимлиги Сўх туманига хайрия карвони жўнатгани, 230 нафар сўхлик Tashkent City’даги қурилиш ишларида қатнашиш учун пойтахтга олиб келингани, Сўхда 3 та дам олиш маскани яратилиши, вилоят марказига авиақатновни йўлга қўйиш режалаштирилаётгани ҳақида хабарлар берилган.
Изоҳ (0)