Хитой Касалликларни назорат қилиш ва олдини олиш маркази мутахассислари ўтган ҳафтада Пекиндаги улгуржи бозорда аниқланган COVID-19 инфекциясининг геном маълумотларини аниқлади. Бу ҳақда «РБК» хабар берди.
Маълум қилинишича, марказ томонидан Пекинда касалланган беморда ва «Синьфади» бозоридаги ташқи муҳитда аниқланган вируснинг геном маълумотлари очилган.
Мутахассислар бозордаги эпидемиологик вазият ва вируснинг геноми ҳақидаги маълумотларни Жаҳон соғлиқни сақлаш ташкилотига ва Грипп ҳақидаги барча маълумотларни алмашиш бўйича халқаро ташаббусга (GISAID) халқаро жамоатчиликнинг умумий фойдаланиши учун жўнатган.
Пекиндаги «Синьфади» улгуржи бозорида вирус 12 июнь куни аниқланган. Гўшт маҳсулотларини тадқиқ қилиш бош марказининг икки нафар ходимида коронавирус аниқлангач, савдо зали ёпилган, бозор атрофидаги ҳудудда эса қаттиқ назорат чоралари жорий қилинган.
Аввалроқ Пекинда аниқланган коронавирус Ухандагисидан хавфлироқ бўлиши мумкинлиги айтилганди. Пекинда коронавирус эпидемияси авж ола бошлагани туфайли шаҳардан чиқиш тақиқлаб қўйилди.
Хитойда коронавируснинг биринчи тўлқини 2019 йилнинг декабрь ойида юзага келди. Март ойининг охирида Хитойнинг Соғлиқни сақлаш давлат қўмитаси мамлакатда эпидемия тарқалиши тўхтаганини маълум қилган.Шанхайдаги пневмонияни даволаш бўйича экспертлар гуруҳи раҳбари Чжан Вэньхун 2020 йилнинг ноябрь ойида Хитойда коронавируснинг иккинчи тўлқини юз бериши мумкинлигини тахмин қилганди. Вэньхуннинг сўзларига кўра, коронавирус паст ҳароратга нисбатан яхши мослашган, шу сабабли у қишда тезроқ тарқалади. Мутахассиснинг фикрича, иккинчи тўлқин биринчи тўлқин каби тезкор бўлмайди.
Изоҳ (0)