АҚШ президентининг миллий хавфсизлик бўйича собиқ маслаҳатчиси Жон Болтон ўзининг «Бу юз берган хона: Оқ уй мемуарлари» китобида ёзишича, Дональд Трамп Буюк Британиянинг ядро қуроли борлигини билмаган. Бу ҳақда «РБК» хабар бермоқда. Ҳали нашр этилмаган китобнинг мазкур парчаси The New York Times томонидан тақдим этилган.
Бундан ташқари, Дональд Трамп «Финляндия Россия таркибига кирадими?», деб сўраган.
71 ёшли Жон Болтон 2018 йилнинг апрель ойидан Трампнинг миллий хавфсизлик бўйича маслаҳатчиси бўлган. 2019 йилнинг кузида у президент ташаббуси билан истеъфога чиққан. Трамп Болтоннинг бўшатилишига улар ўртасида юзага келган келишмовчилик сабаб бўлганини айтган.
Собиқ маслаҳатчининг «Бу юз берган хона: Оқ уй мемуарлари» китоби 23 июнь куни тўлиқ нашр этилиши керак. Китоб ҳозирги пайтда Amazon’да олдиндан буюртма асосида сотилмоқда ва энг кўп сотиладиган китоблар 100 талигида етакчилик қилмоқда.
Болтон мемуарларининг дастлабки парчалари жорий йилнинг январь ойида нашр қилинган. Уларда Трамп Украинага бериладиган ҳарбий ёрдамни музлатиб қўйишни хоҳлагани айтилади. Бунга сабаб сифатида Трамп унинг 2020 йилдаги сайловда эҳтимолий рақиби Жо Байден ва унинг ўғли Ҳантерга нисбатан терговда Киевдан ёрдам олиш истаги кўрсатилган.
Аввалроқ Жо Болтон Трамп АҚШ президентлигига қайта сайланиши учун Си Цзиньпиндан ёрдам сўрагани ҳақида маълум қилган эди.
Мемуардаги тезисларга жавобан Трамп Болтонни ёлғончиликда айблаган, шунингдек, Болтон ишда кўп хатоликларга йўл қўйгани, агар унинг гапига қулоқ солганида ҳозир «олтинчи жаҳон уриши»га олиб келган бўлиши мумкинлигини айтган.
Мазкур китоб сабабли АҚШ Адлия вазирлиги собиқ маслаҳатчини судга берди. Вазирликнинг таъкидлашича, Болтоннинг Оқ уйдаги фаолияти ҳақидаги 500 саҳифалик қўлёзма махфий маълумотларга бой. Америка ҳукумати ушбу маълумотни ошкор қилаётган собиқ ёрдамчи лавозимга қабул қилинганидан кейин олган мажбуриятларини бузганлигини таъкидламоқда.
Маълумот учун, Жон Болтон Оқ уйни ўз Twitter аккаунтини блоклаганликда айблаган, шунингдек, у АҚШнинг Шимолий Корея бўйича сиёсатини «самарасиз ва муваффақиятсиз» деб баҳолаган.
Изоҳ (0)