Тожикистон 1 июлдан бошлаб Ўзбекистон ва Бирлашган Араб Амирликлари билан халқаро авиақатновларни қайта тиклайди. Тегишли қарор Тожикистонда коронавирусга қарши кураш бўйича штаб томонидан қабул қилинди, деб ёзмоқда Asia-Plus.
Маълум қилинишича, мазкур рейслар йўловчилари ўз соғлиғи ҳақида тиббий маълумотномага эга бўлиши керак.
Қайд этилишича, Тожикистон Фуқаро авиацияси агентлиги Россия, Туркия ва Хитойга парвозларни ташкил қилиш масаласини ўрганиб чиқади ва коронавирусга қарши кураш штабига таклифлар беради.Тожикистон 20 мартдан бошлаб мамлакатда коронавирус тарқалишининг олдини олиш мақсадида барча аэропортларини ёпган. Бироқ кейинроқ Тожикистон хориждаги фуқароларини олиб келиш учун чартер рейсларни амалга ошириши маълум бўлган.
Хитой билан авиақатновлар эса январь ойининг охирида тўхтатилганди. Тошкент ва Душанбе ўртасидаги авиақатновлар 16 март куни тўхтатилган.
Аввалроқ Ўзбекистон ҳукумати 1 июлдан бошлаб Душанбе билан авиқатновларни тиклаш режаси ҳақида Тожикистонни хабардор қилганди.
Маълумот учун, Ўзбекистон коронавирус пандемияси сабабли тўхтаб қолган халқаро авиқатновларини 15 июндан бошлаб «қизил», «сариқ» ва «яшил» рейслар принципи асосида қайта тиклади.
Изоҳ (0)