Жаҳон соғлиқни сақлаш ташкилоти Буюк Британиянинг коронавирусга чалинган оғир беморларни дексаметазондан фойдаланиб даволаш борасидаги тадқиқотини «илмий ютуқ» деб атади.
«Бу сунъий нафас олдириш аппаратига улаш ва кислород ёрдами талаб этилган COVID-19’га чалинган беморларнинг ўлими даражаси камайганини кўрсатган биринчи препаратдир», — дейди ташкилоти раҳбари Тедрос Гебрейесус Женевада бўлиб ўтган йиғилишда.
Дастлабки маълумотларга кўра, дексаметазоннинг қўлланилиши сунъий нафас олдириш аппаратига уланган беморлар ўлим даражасини учдан бир қисмга, кислород ниқобида бўлган беморларда эса бу кўрсаткичнинг 20 фоизга камайтиришга ёрдам берганини кўрсатган.
«Буюк Британия ҳукумати, Оксфорд университети, касалхоналар ва ҳаётни сақлаб қолувчи ушбу илмий ютуққа ҳисса қўшган беморларни табриклайман», — дея қўшимча қилган у.
Дексаметазон бу — ўтган асрнинг 60 йилларидан бери яллиғланишга қарши восита сифатида фойдаланиб келинадиган стероид. У онкологияда ҳам қўлланилади. Ташкилотнинг қайд этишича, ушбу дори воситасининг ижобий таъсири фақат касалликнинг оғир босқичида бўлган беморларда кузатилган.
Ҳозирча Оксфорд университети тадқиқотчилари препаратнинг дастлабки натижаларини ошкор этди. Яқин кунларда ЖССТ COVID-19’ни даволаш бўйича ўз тавсияларини янгилаш учун тўлиқ ҳисоботни кутмоқда.
Бундан аввал АҚШда коронавирусни даволашда безгакка қарши препаратлар самарасиз деб топилгани хабар берилган эди.
Маълумот учун, дунё бўйича коронавирус билан касалланганлар сони 8 миллиондан ошди. Ҳозирга қадар дунё бўйлаб коронавирусга чалинган беморларнинг 3,8 миллиондан ортиғи даволанишга муваффақ бўлган, COVID-19 қурбонлари сони салкам 437 минг кишига етган.
Изоҳ (0)