Хитой ва Ҳиндистон ўртасидаги чегаранинг мунозарали ҳудудида содир бўлган тўқнашув оқибатида 20 нафар ҳинд аскари ҳалок бўлди. Бу ҳақда Ҳиндистон армияси баёнотига таяниб, АNI News хабар берди.
Можаро 16 июнь куни кечаси Ҳимолайдаги Лaдaкх ҳудудида содир бўлган. Тасдиқланмаган маълумотларга кўра, ҳар икки томон ҳарбий хизматчилари ўқотар қуроллардан фойдаланмаган — фақат тош ва мих қоқилган металл таёқлар. Ҳарбийлар ўртасидаги жанг 6 соатга яқин давом этган. Дастлаб ҳинд армияси 3 нафар қурбон ҳақида маълумот берган. Кейинроқ яна 17 киши олинган тан жароҳатлари оқибатида вафот этганини билдирган.
Ҳиндистон мазкур можарода Хитойни айбламоқда. Хитой ТИВ эса ўз навбатида ҳинд ҳарбий хизматчилар чегарани икки маротаба ноқонуний кесиб ўтгани ва хитойлик ҳарбийларга ҳужум қилганини билдирган. Хитой қурбонлар ҳақида маълумот бермаган. Айрим манбаларнинг сўзларига кўра, тўқнашув оқибатида 43 нафар хитойлик ҳалок бўлган ёки жароҳат олган.
BBC’нинг ёзишича, бу ҳинд-хитой чегарасида сўнгги 45 йил ичида қурбонларга олиб келган илк тўқнашув ҳисобланади. Ҳиндистон армиясининг маълум қилишича, можародан сўнг томонлар Лaдaкхдаги кучларини олиб чиқиб кетган.
Маълумот учун, Лaдaкх орқали Ҳиндистон ва Хитой ўртасидаги демаркация линияси ўтган. Ҳимолайда чегарага оид ҳал этилмаган масалалар сабаб 1962 йилда икки мамлакат ўртасида чегара уруши юзага келиб, 2 ой давом этганди. Шундай буён чегарада йирик можаро кузатилмаган эди.
Изоҳ (0)