АҚШ федерал ҳукумати 2003 йилдан бери илк бора яна ўлим жазосини тайинлашни қайта бошлаши мумкин. Тўрт нафар маҳкумга нисбатан июль ва август ойларида ўлим жазоси ижро қилинади. Бу ҳақда АҚШ адлия вазирлиги хабар қилган.
Тўрттала маҳкум ҳам болаларни ўлдириш жиноятида айбдор деб топилган, икки нафар жиноятчи вояга етмаганларни қийнаб, зўрлаганлиги исботланган.
Уч нафар жиноятчи 13—17 июль кунлари, яна бир маҳкум эса 28 августда қатл қилинади.
АҚШ бош прокурори Уильям Баррнинг айтишича, жиноятчиларга нисбатан мамлакат конституцияси ҳамда қонунларига мувофиқ тўлиқ ва адолатли суд тергови амалга оширилган.
«Ушбу ваҳшиёна қотилликлар қурбони бўлганлар ва уларнинг оилалари учун ҳам суд тизими воситасида жиноятчиларга адолатли жазо беришимиз лозим», — деган Барр.
Ўлим жазоси 2019 йилда амалга оширилиши лозим эди, бироқ ҳудуддаги судларда қабул қилинган қарор туфайли ижро этилмаган, дейилади АҚШ адлия вазирлигининг баёнотида. Кейинчалик Колумбия округидаги АҚШ апелляция суди ҳудудий суд қарорини бекор қилган ва федерал ҳукуматларнинг ўлим жазосини қайта тиклашига рухсат берилганди.
Ўлим жазоси АҚШнинг айрим штатларида ҳанузгача амалга ошириб келинади. Death Penalty Information Center маълумотларига кўра, 2019 йилда мамлакатда 22 нафар маҳкум қатл қилинган. Ўлим жазоси Алабама, Жоржия, Теннесси, Флорида, Миссури, Жанубий Дaкoтa штатларида ижро этилган. Деярли барча маҳкумлар танага инъекция юбориш йўли билан ўлдирилган.
Изоҳ (0)