Швециянинг COVID-19 билан курашдаги 3 та хатоси маълум қилинди

Янги Зеландия ҳукуматининг илмий маслаҳатчиси, профессор Майкл Бейкернинг маълум қилишича, Швеция ҳукумати COVID-19 касаллигига қарши кураш учун қаттиқ карантин чораларини қўллашдан бош тортганида хатога йўл қўйган. Бу ҳақда «РБК» хабар берди.

Унинг сўзларига кўра, Швециянинг вирус билан курашдаги ёндашуви учта нотўғри фаразга асосланган. «Биринчи фаразга кўра, ҳатто вирус кенг тарқалиши шароитида ҳам сиз хавф гуруҳига кирадиган фуқароларни ҳимоя қила оласиз, бироқ шведларда бундай бўлмади», — деб таъкидлаган олим.

Аввалроқ Швециянинг бош эпидемиологи Андерс Тегнелл мамлакат ҳукумати қариялар уйларида касаллик ўчоқлари пайдо бўлишининг олдини ололмаганини тан олган, бу эса кўплаб қарияларни ҳаётдан олиб кетган. Бундан ташқари, Швецияда ўлим даражаси қўшни Норвегия, Дания ва Финляндиядан юқори.

Швеция ҳукуматининг маслаҳатчиси томонидан илгари сурилган иккинчи фаразга кўра, мамлакат аҳолисида қисқа вақт ичида «жамоавий иммунитет» ҳосил бўлиши керак эди. «Бу ерда ҳам сезиларли силжиш бўлмади», — деди Бейкер. Статистикага кўра, фақат Стокгольмнинг ўзида COVID-19 билан шаҳар аҳолисининг 10 фоиздан камроғи касалланган. «Жамоавий иммунитет»ни ишлаб чиқиш учун эса бутун мамлакат бўйича аҳолининг 60 фоизи касаллик билан оғриши керак эди.

«Учинчи фаразга кўра, карантин чораларининг йўқлиги иқтисодий қийинчиликларни четлаб ўтишга имкон беради, бироқ бундай умидлар ўзини оқламади», — дея таъкидлаган Бейкер. Еврокомиссия прогнозига кўра, 2020 йил якунида Швеция ялпи ички маҳсулоти 6,1 фоизга пасаяди.

Бейкернинг қайд этишича, у швециялик экспертлар ва эпидемиологларни шахсан танийди ва уларни профессионал сифатида ҳурмат қилади. «Пандемия бошланган вақтда ҳеч ким қайси йўл тўғри, қайсиси нотўғри эканлигини айта олмасди. Швециялик олимларнинг фикрлари эса баъзи мантиқларга эга эди. Тан олиш керакки, Швеция хатога йўл қўйди», — деди профессор. Шунингдек, у қироллик ўзининг вирусга қарши кураш стратегиясини тўғирлашига умид билдирган.

Бейкернинг сўзларига кўра, пандемиянинг бошида Янги Зеландияда баъзи олимлар Швеция тажрибасига қизиқиш билдирди, бироқ якунда маҳаллий ҳукумат касалликка қарши кураш учун тезкор чоралар қабул қилган Осиё давлатлари танлаган йўлдан кетишга қарор қилди. «Бу бизга кўплаб вирус юқиши занжирларини бартараф этишга, шунингдек, тестлар сонини кўпайтиришга имкон берди», — деди Бейкер. Унинг маълум қилишича, 5 миллион аҳолиси бўлган давлатда кунига 5-10 мингта тест ўтказилган. Янги Зеландия барча касаллик ўчоқларини йўқ қилиб, ижтимоий масофаланиш билан боғлиқ барча чекловларни олиб ташлади.

Жонс Ҳопкинс университети маълумотлари бўйича Швецияда 15 июнь ҳолатига кўра, 52 383 киши коронавирусга чалинган ва 4891 киши касаллик оқибатида вафот этган. Янги Зеландияда касалланганларнинг умумий сони 1504 кишини, қурбонлар сони эса 22 кишини ташкил қилмоқда.

Аввалроқ Италиялик шифокор Швециянинг коронавирус бўйича стратегиясини оқилона бўлмаган қарор деб атаганди.